الخميس، 13 أكتوبر 2011

خۆكوشتنی ژنان لە ئیلام گەیشتووەتە لوتكە

09:56:13/10/2011
وارڤین: ئەندامێكی لیژنەی كۆمەڵایەتی مەجلیسی ئێران رایگەیاند كە لە پارێزگای كوردنشینی ئیلام لە كۆی هەر دوو هەزار كەس 2 كەس هەوڵی خۆكوشتن دەدەن و لەم نێوانەشدا ژنان ژمارەیەكی پێوانەییان تۆمار كردووە. 

داریوش قەنبەری لەوتووێژێكدا لەگەڵ پەیامنێری كۆمەڵایەتی پانا لەبارەی ئاماری خۆكوشتن لە ناوچەكانی رۆژئاوای ئێران(رۆژهەڵاتی كوردستان) گوتی: "بەداخەوە رێژەی خۆكوشتن لەم پارێزگایانەدا بەرزەو پارێزگای ئیلامیش لە ئاماری خۆكوشتن دا بە بەراوورد لەگەڵ پارێزگاكانی دیكەی ئێران بەرزترین ژمارەی خۆكوشتنی تێدایە". 

ئەو لەدرێژەی قسەكانیدا گوتی: "ئامارەكان ئەوە نیشاندەدەن كە لە هەر دوو هەزار كەس لە ئیلام دوو كەس خۆیان دەكوژن و ئەم ئامارەیش ساڵانە روو لە زیادبوون دەكات". 

نوێنەری خەڵكی ئیلام لە مەجلیسی ئێران هەروەها نەیشاردەوە كە بە گشتی رەوشی فەرهەنگی لەم ناوچانەدا باش نییەو گوتی: "لاوازی و داماوی فەرهەنگی و ئابووری و نەبوونی یەكگرتوویی كۆمەڵایەتی كاریگەرییەكی زۆریان هەیە لەسەر بەرزبوونەوەی ئاماری خۆكوشتن لەم پارێزگایەدا".

قەنبەری ئاماژەی بە ئاسەوار و دەرەئەنجامە دەروونییەكانی پاش شەڕی ئێران و عێراق كرد و گوتی: "بە بوێرییەوە دەتوانم بڵێم كە ئاماری خۆكوشتن لە نێوان ژناندا ژمارەیەكی بەرزتری هەیەو خۆسووتاندنیش یەكێكە لە رێگە باوەكانی ژنانی ئەم پارێزگایە".

بەقسەی ئەم نوێنەرەی مەجلیسی ئێران قۆناغی تێپەڕین لە ترادسیۆنەوە بۆ مۆدێڕنیتە یەكێكە لە فاكتەرە سەرەكییەكانی بەرزبوونی خۆكوشتنی ژنانی ئیلام.

ئەو هەروەها ئاماژەی بەوەش كرد كە كۆنترۆڵەكانی دەرەوەی یاساو عورف و كێشە پەیوەندیدارەكان بە دابونەریتی رابردوو، لەمپەرگەلێك دروست دەكات كە لەئەنجامدا گوشارێكی زۆر دەكاتە سەر ژنان و قوربانییەكی زۆریان لێدەگرێت. هەروەها تایبەتمەندی كۆمەڵگای پیاوسالارانە كاریگەرییەكی تێكددەرانەی زۆری لەگەڵ خۆیدا هەیە. 

قەنبەری لە كۆتایی قسەكانیدا رەخنەی لە بەرپرسانی ئێران گرت و گوتی كە ئەوان وەك پێویست لێكۆڵینەوەیان لە رەوشی دانیشتوانی ئەو دەڤەرە نەكردووەو لەوە نەكۆڵیونەتەوە كە بۆچی پەنا بۆ خۆكوشتن دەبەن.    

الأربعاء، 12 أكتوبر 2011

باندێكی لەشفرۆشی دەستگیر دەكرێت

05:31:12/10/2011
وارڤین: هێزەكانی یاریدەدەرێتی ئاسایشی خانەقین باندێكی لەشفرۆشییان دەستگیر كرد.  بەپێی ئەو زانیارییانەی كە وارڤین لە سەرچاوەیەكی بڕواپێكراوەوە دەستیكەوتووە باندەكە لە پیاوێك دوو ئافرەت پێكھاتوون و بە رەگەز عەرەبن. 

لەوبارەیەوە سەرچاوەیەك لە راگەیاندنی ئاسایشی گشتی گەرمیان وێڕای پشتڕاستكردنەوەی هەواڵەكە بە وارڤینی راگەیاند كە ئەوان بە وردی خەریكی لێكۆڵینەوەن لەو باندەو پێدەچێت پەیوەندییان لەگەڵ چەند باندێكی دیكەی لەشفرۆشیدا هەبێت. 

 سەرچاوەكە گوتی:" باندەكە بە رەگەز عەرەبن و خەڵكی ناوچەكانی باقووبە و جەلەولان و بۆ كاری لەشفرۆشی ھاتوونەتە خانەقین. ئەو پیاوە كە خەڵكی بۆ ئەو ئافرەتانە ھێناوە پێشتر لە سەر ھەمان تاوان دەستگیر كراوەو لەئێستادا بە پێی مادەی ٣ ئەندامانی باندەكە راگیراون و دۆسیەكانیان رەوانەی دادوەری لێكۆڵینەوەی خانەقین كراوە".

ئا: ئه‌رسه‌لان ره‌حمان

گۆڤارێك ‌و دوو رۆژنامە بە حەڤدە ملیۆن دینار سزادران

04:58:12/10/2011
وارڤین: سەنتەری میترۆ لەپاڵ كاراكردنی مادەی (نۆ)ی یاسای كاری رۆژنامەنوسی دوای كاراكردنی بڕگەكانی مادەی (حەوت)یش دەكات بڕگەكانی ماف ‌و ئیمتیازاتی رۆژنامەنووسانە لەیاسای ژمارە 35ی ساڵی2007.
بەپێی بڕگەی 5ی یاسای كاری رۆژنامەنوسی كە تایبەتە بە تاوانەكانی (ناوزڕاندن ‌و سووكایەتی) لەیەك رۆژدا، دادگای كەتنی هەولێر (گۆڤاری وارڤین ‌و رۆژنامەی ئاوێنە سپۆرت ‌و رۆژنامەی باس)ی بە 17 ملیۆن دینار سزا دا. 

رۆژی 10ی تشرینی یەكەم دادگای كەتنی هەولێر بەپێی مادەی(9 بڕگەی5 ) لەیاسای كاری رۆژنامەنووسی ژمارە 35ی 2007 كە تایبەتە بە (جنێودان ‌و ناوزڕاندن) بریاریدا رۆژنامەی (ئاوێنە سپۆرت)ی بە پێنج ملیۆن دینار غەرامە كرد هەروەك رۆژنامەنوس هیوا محەمەد قادری بە یەك ملێۆن دینار غەرامەكرد.

پێشتر رۆژنامەی ئاوێنە سپۆرت راپۆرتێكی لەسەر یانەی هەولێر بڵاوكردەوە كە باس لەدۆڕاندنی ئەو یانەیە دەكات لە خولی نایابی عیراق. یانەكە سكاڵای لەسەر رۆژنامەنوس ‌و ڕۆژنامەكە تۆماركرد.

لەلایەكی دیكەوە رۆژی 10ی تشرینی یەكەم دادگای كەتنی هەولێر بە پێی مادە9/ دووهەم (سووكایەتیكردن بە بیروباوەڕی ئاینی) لە یاسای كاری رۆژنامەنوسی ژمارە 30ی 2007 بریاریدا دەركرد گۆڤاری (وارڤین) بە پێنج ملیۆن دینار غەرامە بكرێت هەروەها رۆژنامەنوس (لەنجە عبدالله‌و مەسعود مەلا هەمزە) هە ریەكێكیان یەك ملیۆن دینار غەرامە بكرێن بەهەمان یاسا‌و لەبڕگەی پێنجدا كە تایبەتە ( بەجنێودان ‌و سووكایەتی).

گۆڤاری وارڤین بابەتێكی سەبارەت بە فیلمێك بڵاوكردۆتەوە تایبەتە بە كارەكانی وەزارەتی رۆشنبیری لە بەرامبەردا وەزارەتی رۆشنبیری سكاڵای یاسایی لەسەر گۆڤارەكە تۆماركردووە.
هاوكات رۆژی 10ی تشرینی یەكەم دادگای كەتنی هەولێر بەپێی مادەی9برگەی5  لە یاسای كاری رۆژنامەنووسی ژمارە 35ی 2007 كە تایبەتە بە (جنێودان ‌و ناوزڕاندن) رۆژنامەنووس (بەرهەم عەلی) سەرنووسەری رۆژنامەی (باس)ی بە چوار ملیۆن دینار غەرامە كرد.
رۆژنامەی ناوبراو بابەتێكی رۆژنامەوانی بڵاوكردۆتەوە گوایە ئەمینداری گشتی یەكگرتووی ئیسلامی نامەیەكی ئاراستەی ئەمینداری حزبی ئیسلامی عێراقی كردبێت. 
سەنتەری میترۆ لە زۆربەی بەیاننامە‌و هەوڵوێستەكانیدا داوای لەدەزگای دادوەری هەرێم كردووە لەبری پەنابردن بۆ یاسای مەدەنی لەیەكلاكردنەوەی تاوانەكانی تایبەت بەبڵاوكردنەوە پەنا بۆ یاسای ژمارە 35ی ساڵی 2007 (یاسای كاری رۆژنامەگەری لەهەرێمی كوردستان) ببرێت.

سەنتەری میترۆ رایدەگەیەنێت: "لەپاڵ كاراكردنی مادەی (نۆ) داوادەكەین داواكاری گشتی هەرێم دوای یاسایی لەسەر ئەو كەس ‌و لایەنانە تۆمار بكات كە پێچەوانەی بڕگەكانی ماف ‌و ئیمتیازاتی رۆژنامەنووسانە لەیاسای ژمارە 35ی ساڵی2007 رەفتاریان لەگەڵ رۆژنامەنووسان كردوە".

یاسای كاری رۆژنامەنوسی جەختدەكاتەوە، "هەر كەسێك بەهۆی كارەكەیەوە سووكایەتی بەرۆژنامەنووس بكات، یان دەستدرێژی بكاتە سەر ئەوا هەمان ئەو سزایە دەیگرێتەوە كە بۆ دەستدرێژیكردنە سەر فەرمانبەرێك لەكاتی یان بەهۆی بەجێهێنانی ئەركەكانی دانراوە".

الثلاثاء، 11 أكتوبر 2011

چالاكوانێكی ژن: پێویستە ئەو لایەنانەی لێكۆڵینەوە لە پرسی ژنكوژیدا دەكەن بڕوایان بەو پرسە هەبێت

04:22:11/10/2011
وارڤین: دوای ئەوەی لە ماوەی رابردوودا زیاتر لە (30) ژن بە هۆكار و شێوازی جیاجیا كوژران، چالاكوانێكی بواری مافەكانی ژنان رایدەگەیەنێت پێویستە ئەو پۆلیسانەی بەدواداچوون بۆ كەیسی كوژرانی ژنان دەكەن بڕوایان بە پرسی ژن هەبێت.

رۆژی 29ی ئەیلولی رابردوو، بەرپرسی دەزگای وارڤین بۆ پرسەكانی ژن لەنجە عەبدوڵڵا لە كۆنگرەیەكی رۆژنامەوانیدا رایگەیاند، تەنیا لەماوەی مانگی ئەیلولی رابردوودا زیاتر لە (30) ژن كوژراون و یان خۆیان سووتاندووە، پرسی بەرزبوونەوەی ئاماری توندوتیژی دژی ژنان لە میدیای ناوخۆی و دەرەكیدا بووە بابەتی رۆژ.

چالاكوانانی مافەكانی ژنان بەرزبوونەوەی ئاماری توندوتیژی دژی ژنان لە هەرێمی كوردستان بە زەنگێكی مەترسیدار دەزانن و لەو بڕوایەدان هەوڵێك لەئارادایە بۆ شاردنەوەی راستییەكان.

شیلان حەمەنوری، چالاكوانی مافەكانی ژن رایگەیاند، كۆمەڵگەی ئێمە كۆمەڵگەیەكی پیاوسالارە و هەموو جۆرەكانی توندوتیژی دژی ژنان پەیڕەو دەكرێت و ناكرێت هەموو كاتێك پاساوەكانی ژیان لەدەستدانی ژنان ببەستینەوە بەباری دەروونی ژنەكانەوە.

ئەم گوتانەی شیلان، دوای ئەوە هاتن كە راگەیاندنی پۆلیسی هەولێر لە لێدوانێكدا بۆ دەزگاكانی راگەیاندن ئاشكرای كردبوو كە ئەو دوو ژنەی لەمیانەی ئەم هەفتەیەدا لە هەولێر ژیانیان لەدەستداوە باری دەروونییان تەواو نەبووە.

شیلان حەمەنوری، گوتیشی: "خۆ كوشتن و خۆسووتاندنی ژنان ئەنجامی مامەڵەی نالەباری كۆمەڵگەو خێزانە لەگەڵیان".

هەروەها گوتی: "ژنان لە كۆمەڵگەی ئێمەدا ئەوەندەی توندوتیژییان بەرامبەر دەكرێت و دەچەوسێندرێنەوە تووشی بارێكی ئاڵۆزی دەروونی و خەمۆكی و بێهیوایی دەبن و ناچار دەبن پەنا بەرنە بەر كۆتاییهێنان بە ژیانیان".

سەبارەت بە پرسی لێكۆڵینەوە لە دۆسیەكانی كوژرانی ژنان ئەو چالاكوانە گوتی: "دەبێت ئەو كەسانەی لە پۆلیس لێكۆڵینەوە لە دۆسیەكانی ژن كوژی دەكەن بڕوای تەواویان بە پرسی ژنان هەبێت و مەشق و راهێنانی تایبەتییان پێبكرێت و لەبارەی پرسی توندوتیژی و مافەكانی ژنان وشیار بكرێنەوە".

هەروەها سەبارەت بەو لێدوانەی بەڕێوەبەری پۆلیسی هەولێر كە لە كۆنگرەیەكی رۆژنامەوانیدا هۆكاری خۆكوشتن و ژیانلەدەستدانی ژنان گەڕاندبوویەوە بۆ كاریگەری دراما دۆبلاژكراوەكان ئەو چالاكوانەی ژن گوتی: "رەنگە دراماكان كاریگەری نەرێنییان لەسەر تاكەكان هەبێت ئەویش بە دوو شێوەیە: یەكەم ئەوەی كە تاك هەوڵی لاساییكردنەوەی حاڵەتەكان دەدات و دووهەمیشیان رەنگە تاك لەژێر كاریگەری ئەو درامایانەدا بەدوای میسالیەتدا بگەڕێت بەتایبەتی لە ئەڤین و خۆشەویستیدا، بەڵام لەهەموو حاڵەتەكاندا ناكرێت بە بێ لێكۆڵینەوەی زانستی لێدوانی لەو جۆرە بدرێت".

ئاماژەشی بۆ ئەوە كرد، كە ئەو ژنانەی رووبەڕووی توندوتیژی بوونەتەوە رەنگە لە خێزانێكی هەژاردا بن و تەنانەت تەلەفزیۆنیشیان نەبێت.

ئا: ئه‌رسه‌لان ره‌حمان