الخميس، 27 فبراير 2014

ئێن ئاڕ تی‌ زانیاری‌ وردتر له‌ باره‌ی‌ كوشتنی‌ كچه‌ شانزه‌ ساڵییه‌كه‌ له‌هه‌ولێر بڵاوده‌كاته‌وه‌

.: NRT.TV :.

NRT – هه‌ولێر: ئه‌و كچه‌ شانزه‌ ساڵییه‌ی‌ ئه‌مڕۆ له‌ لایه‌ن باوكییه‌وه‌ به‌ 15 فیشه‌ك كوژرا، پێشتر له‌ شه‌ڵته‌ری‌ په‌نادانی‌ ژنان بووه‌ و له‌وێ به‌هۆی‌ كێشه‌یه‌كه‌وه‌ رووبه‌ڕووی‌ دادگا كراوه‌ته‌وه‌ و دوای‌ مانگێك ده‌ستبه‌سه‌ر كردن، به‌ كه‌فاله‌تی‌ یه‌ك ملیۆن دینار دراوه‌ته‌وه‌ ده‌ست مامی‌. 

كات 08:00ی‌ سه‌رله‌به‌یانی‌ ئه‌مڕۆ، له‌ گه‌ڕه‌كی‌ 94ی‌ باداوه‌ی‌ شاری‌ هه‌ولێر، "ئیمان.ع.و"، له‌ خه‌ودا بوو، ئه‌و كاته‌ی‌ درایه‌ به‌رده‌ستڕێژی‌ گوله‌ و كوژرا و پۆلیسیش رایگه‌یاند، تاوانه‌كه‌ له‌ لایه‌ن باوكییه‌وه‌ ئه‌نجام دراوه‌.

له‌ لێدوانێكی‌ تایبه‌ت بۆ ماڵپه‌ڕی‌ (NRT)، به‌ڕێوبه‌ری‌ به‌ڕێوبه‌رایه‌تی‌ به‌ره‌نگاربوونه‌وه‌ی‌ توندوتیژی‌ هه‌ولێر رائید ژیله‌مۆ عه‌بدولقادر رایگه‌یاند، تاوانه‌كه‌ به‌ چه‌كی‌ كڵاشینكۆف ئه‌نجامدراوه‌ و بكوژه‌كه‌ به‌ره‌و شوێنێكی‌ نادیار رایكردووه‌ و تا ئێستا ده‌ستگیر نه‌كراوه‌.

ئه‌و به‌رپرسه‌ی‌ به‌ڕێوبه‌رایه‌تی‌ ئه‌وه‌شی‌ خسته‌ڕوو، ئه‌و كچه‌ به‌ هۆی‌ كێشه‌ی‌ كۆمه‌ڵایه‌تییه‌وه‌ له‌ رابردوودا ناچار بووه‌، ماڵ به‌جێبهێڵێت و له‌و باره‌یه‌وه‌ وتی‌ "پێشتر به‌ هۆی‌ بوونی‌ كێشه‌ له‌گه‌ڵ كوڕێكدا له‌ بنكه‌ی‌ پۆلیسی‌ سه‌روه‌ران په‌ڕاوی‌ لێكۆڵینه‌وه‌ بۆ كێشه‌كه‌ كراوه‌ته‌وه‌ و كوڕه‌كه‌ به‌ بڕیاری‌ دادوه‌ر ده‌ستبه‌سه‌ر كراوه‌ و ئیمانیش ره‌وانه‌ی‌ شه‌ڵته‌ری‌ ژنان له‌ هه‌ولێر كراوه‌".

وتیشی‌ "له‌ كاتی‌ مانه‌وه‌ی‌ له‌ شه‌ڵته‌ردا، به‌ هۆی‌ ئه‌وه‌ی‌ كێشه‌ی‌ درووستكردووه‌، شوێنی‌ خه‌وتنی‌ ئه‌و كچه‌ و هاوڕێیه‌كی‌ جیاكراوه‌ته‌وه‌ و له‌ به‌رامبه‌ریشدا ئیمان ناڕازی بووه‌ و چه‌ند شووشه‌یه‌كی‌ په‌نجه‌ره‌ی‌ شه‌ڵته‌ره‌كه‌ی‌ شكاندووه‌ و به‌و هۆیه‌وه‌ له‌ لایه‌ن چاودێرانی‌ شه‌ڵته‌ره‌كه‌وه‌ سكاڵای‌ له‌ دژ تۆمار كراوه‌".

به‌ گوێره‌ی‌ زانیارییه‌كانی‌ ئه‌و به‌رپرسه‌ی‌ به‌ره‌نگاربوونه‌وه‌ی‌ توندوتیژی‌، ئیمان راپێچی‌ دادگا كراوه‌ و به‌ تۆمه‌تی‌ زیانگه‌یاندن به‌ موڵك و ماڵی‌ گشتی‌ و حكومی‌ خراوه‌ته‌ زیندان و ماوه‌ی‌ یه‌ك مانگ و نیو له‌ زینداندا بووه‌.

به‌ وته‌ی‌ به‌ڕێوبه‌ری‌ به‌ڕێوبه‌رایه‌تی‌ به‌ره‌نگاربوونه‌وه‌ی‌ توندوتیژی‌ هه‌ولێر، سێ رۆژ له‌مه‌و به‌ر ئه‌و كچه‌ له‌ لایه‌ن دادگاوه‌، به‌ كه‌فاله‌تی‌ یه‌ك ملیۆن دیناری‌ عێراقی‌، ئه‌و كچه‌ راده‌ستی‌ مامی‌ كراوه‌ته‌وه‌.

دوای‌ گه‌ڕانه‌وه‌ی‌ بۆ ماڵ، سه‌رله‌به‌یانی‌ ئه‌مڕۆ ئیمان له‌ خه‌ودا كوژراو پۆلیسش به‌دوای‌ باوكیدا "ع. و" ده‌گه‌ڕێت، كه‌ وه‌ك تۆمه‌تباری‌ سه‌ره‌كی‌ تاوانی‌ كوشتنی‌ كچه‌كه‌ی‌ ناوی‌ ده‌ربرێت.

ئا: ئه‌رسه‌لان ره‌حمان

الأحد، 9 فبراير 2014

ڤیدیۆ :ئێران "خەونی وێرانكردنی ئیسرائیل" لە فیلمێكدا نمایشدەكات

.: NRT.TV :.

 ئێن ئاڕ تی – تاران: كەناڵی رەسمی ئێران لە توێی بەڵگە فیلمێكدا كە لە ژێر ناونیشانی "كابووسی هەڵوكان" پەخشیكرد، سیناریۆی وێران كردنی ئیسرائیل و تیكشكاندنی كەشتیگەلی ئەمریكای لە ئاوی كەنداو نمایشكرد.



بەڵگە فیلمەكە وێڕای پەخشكردنی لە كەناڵی رەسمی ئێراندا، لە چەناڵی "لینز ایران" بڵاوكراوەتەوە و كۆی دیمەنەكانی فیلمەكە ئاوێتە كراوە لەگەڵ وتارێكی رێبەری باڵای شۆڕشی ئیسلامی ئێران عەلی خامەنەئی، كە لە 2011 لە نمایشێكی سەربازیدا ئاراستەی گەلانی ئێران و نەیارانی كۆماری ئیسلامی كرد.



لەو فیلمەدا، فڕۆكە بێ فڕۆكەوانەكانی دروستكراوی ئێران بۆمبابارانی فڕۆكەخانەی  بن گۆریۆنی تەلئەبیب و ناوەندە سەربازی و سیاسییەكانی ئیسرائیل لە حەیفا و تەلئەبیب دەكەن و هێرش دەكەنە سەر وێستگەی بەرهەمهێنانی چەكی ناووكی ئیسرائیلی ناسراو بە "دیمونا" و ناوچەكە دوكەڵی رەشی لێ بەرز دەبێتەوە و كۆشك و باڵەخانەكانیش دادەڕمێن وەك ئەوەی پولەكانی یاری دۆمینە دادەڕمێن.



هەر لەو فیلمەدا رادارە ئێرانییەكان كەشتیگەلی ئەمریكایی لە ئاوی كەنداو ناسراو بە "یو ئێس ئێس ئەبراهام لینكۆڵن" كە لەسەر شاشەی رادارەكان دەركەوتووە دەكەنە نیشانە و و لە لایەن ئێرانەوە بە موشكەی دوور هاوێژ تێك دەشكێنرێت.



هەڕەشەكانی ئێران لە ئیسرائیل، لە سەردەمی هەشت ساڵ فەرمانڕەوایەتی مەحمود ئەحمەدی نەژاددا گەیشتنە لوتكە و لە ئێستادا ئیسرائیل نیگەرانە لە پێشخستنی بەرنامەی ناووكی ئێران و خاووبوونەوەی هەوڵە نێودەوڵەتییەكانی پەیوەست بە سزادانی زیاتری ئێران.



ڤيديۆ

ئایا 334 وشه‌كه‌ی " هێلی لۆڤ " ره‌خنه‌گره‌كانی رازی كرد ؟

NRT2



ئێن ئاڕ تی – هه‌ولێر: بڵاوبوونه‌وه‌ی كلیپی گۆرانییه‌كی  كچه‌ گۆرانیبێژ "هێلی لۆڤ" مشتومڕی له‌ نێوان لایه‌نگران و نه‌یارانی سیناریۆی كلیپه‌كه‌دا له‌ تۆڕی كۆمه‌ڵایه‌تی فه‌یسبووك درووست كردووه‌. به‌شێك له‌ بینه‌رانی كلیپه‌كه‌ ده‌ڵێن: "ئه‌و كلیپه‌ هێماكانی ماسۆنیه‌تی تێدایه‌". له‌ به‌رامبه‌ریشدا هێلی ره‌تیكرده‌وه‌ كلیپه‌كه‌ په‌یوه‌ندی به‌ "هیچ ئایدۆلۆژیایه‌كه‌وه‌ هه‌بێت".
له‌ كلیپه‌ نوێیه‌كه‌یدا، هێلی لۆڤ به‌ ستایلێكی تێكه‌ڵی كوردی – ئه‌مریكایی كاریكردووه‌. له‌و كلیپه‌یدا ژماره‌یه‌ك نیشانه‌ و سیمبوڵی جۆراو جۆر ده‌رده‌كه‌ون. ئه‌و سیمبوڵانه‌ مشتومڕیان له‌ تۆڕی كۆمه‌ڵایه‌تی فه‌یسبووك به‌دوای خۆیاندا هێنا.
334323722014_1.jpg
له‌ كلیپه‌كه‌دا، هێلی لۆڤ به‌ جلێكی ره‌شه‌وه‌ ده‌رده‌كه‌وێت و دواتر هه‌ریه‌ك له‌ پشیله‌ی ره‌ش، چه‌ند كۆترێك، ژماره‌یه‌ك منداڵ كه‌ پێشوازی له‌ نمایشه‌كه‌ی هێلی ده‌كه‌ن، چه‌ند كه‌سێكی به‌ساڵاچوو كه‌ دژایه‌تی ده‌كه‌ن و ژماره‌یه‌ك گه‌نج كه‌ شوێنپێی هه‌ڵده‌گرن، ده‌رده‌كه‌ون.
له‌ تۆڕی كۆمه‌ڵایه‌تی فه‌یسبووكدا، جگه‌ له‌ په‌یجه‌كه‌ی خۆی، له‌ چه‌ندین په‌یج و ئه‌كاونته‌وه‌ باسوخواسی كلیپه‌كه‌ و هێماكانی مشتومڕیان لێكه‌وتووه‌ته‌وه‌. به‌شێك له‌ بینه‌رانی كلپه‌كه‌ باس له‌وه‌ ده‌كه‌ن، "هێماكانی سێگۆشه‌، به‌رزكردنه‌وه‌ی دوو په‌نجه‌ی ده‌ست وه‌ك هێمای قۆچ، پیشاندانی یه‌ك چاوی كراوه‌، تاتۆكردنی سێگۆشه‌ له‌سه‌ر ده‌ستی، سه‌ماكردن له‌سه‌ر بانێكی شێوه‌ سێگۆشه‌یی؛ سیمبوڵی بزوتنه‌وه‌ی ماسۆنیه‌تی جیهانین".
 له‌ به‌رامبه‌ر ئه‌و تۆمه‌تانه‌دا، كچه‌ گۆرانیبێژ، هێلی لۆڤ روونكردنه‌وه‌یه‌كی 334 وشه‌یی له‌ لاپه‌ڕه‌ی تایبه‌تی خۆی له‌ فه‌یسبووك بڵاوكردووه‌ته‌وه. تێیدا به‌ بێ به‌كارهێنانی ده‌سته‌واژه‌ی "ماسۆنیه‌ت"، وه‌ڵامی زۆرێك له‌ ره‌خنه‌ی نه‌یاره‌كانی داوه‌ته‌وه‌.
444323722014_2.jpg
له‌ سه‌ره‌تای روونكردنه‌وه‌كه‌دا هێلی نووسیویه‌تی: "سوپاس بۆ هەموو کۆمێنت و نامە جوانەکانتان لەسەر کلیپەم،... سوپاس بۆ ئەوانەش کە لێکدانەوەی هەڵەیان بۆ هەندێک لە دیمەنەکانی کلیپەکەم کردووە. دەمەوێت لەم روونکردنەوەیە ئاماژە بەوە بدەم کە پەیوەندیم بە هیچ ئایدولۆژیەتێکەوە نیە".
له‌ روونكردنه‌وه‌كه‌یدا، هێلی له‌ وه‌ڵامی ئه‌وانه‌ی ده‌ڵێن "ئاگركردنه‌وه‌ی ناو كلیپه‌كه‌ هێمای ئه‌هریمه‌نه"‌، ده‌ڵێت: "ئاگر کە کورد لە رۆژێکدا ئاگر دەکەنەوە کە ئەویش جەژنی نەتەوەی کورد و رۆژ سەرکەوتنی کورد بووە لەسەر زوڵم و زۆرداری و هاتنەدی رۆژێکی نوێ بووە و لە هەمانکاتدا تەقاندنەوەی ئەم ئاگرە بۆ ئەوەی خەڵک ئاگای لەمن بێ و لە ماڵەکانیان بێنە دەرەوە، چونکە لە گۆرانیەکەم دەڵێم لە هەر شوێنێک بن هەر کەسێک بن وەرن بۆ ئامانج و خەونەکە"، به‌ڵام روونی نه‌كردووه‌ته‌وه‌ مه‌به‌ست له‌ "ئامانج و خه‌ونه‌كه"‌ چیه‌.
له‌ باره‌ی جلی ره‌شه‌وه‌ ده‌ڵێت: "سەرەتای کلیپەکەم دەستپێدەکات بە هاتنم بە جلێکی رەش ئاماژەیە بە دایکەکانمان کە هەمیشە لە ناخۆشی و نەهامەتی بوونە و جلی رەشیان پۆشیوە، بەڵام لە کۆتایی جلەکان دەگۆڕم بۆ رەنگی زەرد کە رەنگی رۆژە و سەرهەڵدانی رۆژێکی نوێیە".
584523722014_8.jpg
سه‌باره‌ت به‌ كێشانی هێمای سێگۆشه‌یه‌كی ره‌ش له‌سه‌ر دیواری ماڵێك، كه‌ له‌ناو سێگۆشه‌كه‌دا وێنه‌ی "ده‌موچاوێكی ره‌ش و دوو قۆچ كێشراوه‌"، هێلی بێده‌نگ نه‌بووه‌ و له‌ روونكردنه‌وه‌كه‌یدا نووسیویه‌تی: "لۆگۆیەکەم لەناو دیمەنێکدا لەسەر دیوارەکە دیارە کە لە سەر شێوازی سونبولی مێینەیە نەک ئاماژە بێ بۆ ئایدۆلۆژیەک"
104523722014_5.jpg254523722014_6.jpg.
به‌ گوێره‌ی ئینسكلۆپیدیای ئازاد ناسراو به‌ "وێكپیدیا"، "ماسۆنیه‌ت له‌ بنچینه‌دا واته‌ وه‌ستا بنیاتنه‌ره‌كان و به‌ ئینگلیزی (Freemasons)ی پێده‌وترێت. به‌ مانای وه‌ستا ئازاده‌كان، له‌ رووی چه‌مكه‌وه‌ مه‌به‌ست لێی رێكخراوێكی جیهانییه‌، كه‌ ئه‌ندامه‌كانی له‌سه‌ر بنچینه‌ی بیروباوه‌ڕێكی دیاریكراو كۆبوونه‌ته‌وه‌ و كاره‌كانی خۆیان به‌ نهێنی و به‌وپه‌ڕی نادیارییه‌وه‌ ئه‌نجام ده‌ده‌ن. له‌ لایه‌ن هه‌ندێك كه‌س "ماسۆنییه‌كان به‌ نه‌یارانی بیری ئاینی و بڵاوكه‌ره‌وه‌ی بیروباوه‌ڕی عه‌لمانیه‌ت تۆمه‌تبار ده‌كه‌ن".
كلیپه‌كه‌ی هێلی لۆڤ ناوی (Risk it All)ه‌ به‌ مانای "هه‌موو شتێك له‌ پێناویدا ده‌خه‌مه‌ مه‌ترسییه‌وه‌". كاری وێنه‌گرتنی له‌ ‌هه‌ولێر ئه‌نجامدراوه‌ و ‌ و ئاراس تاكی كاری ده‌رهێنان و رێبین جه‌لال كه‌ریم سه‌رپه‌رشتی به‌رهه‌مه‌كه‌ی كردووه‌ و هێلی كاری دابه‌شكردنی میوزیكی ئه‌نجامداوه‌.


584323722014_3.jpg



404523722014_7.jpg

204623722014_10.jpg

جەبار ئەمین: پشتیوانی كانتۆنەكانی خۆرئاوا ئەركێكی دیموكراتيخوازانەیە

.: NRT.TV :.

ئێن ئاڕ تی – قامیشلۆ: پەرلەمانتاری كوردی پەرلەمانی سوید "جەبار ئەمین" رایگەیاند، پشتیوانیكردنی كانتۆنەكانی خۆرئاوای كوردستان ئەركێكی گرنگی دیموكراتیخوازانەیە.



لە لێدوانێكی تایبەتدا بۆ ماڵپەڕی ئێن ئاڕ تی، ئەندامی كوردی پەرلەمانی سوید جەبار ئەمین، رایگەیاند، بە مەبەستی بەسەركردنەوەی كانتۆنەكانی خۆرئاوا و لە نزیكەوە ئاگادار بوون لە رەوشی ناوچەكە، وەك پەرلەمانتارێكی سویدی ئەمڕۆ یەكشەممە بە سەردانێك گەیشتووەتە خۆرئاوای كوردستان.



لە سەروبەندی بەستنی كۆنگرەی جنێف 2 دا، پارتى یەكێتی دیموكراتی ناسراو بە "پەیەدە" بە بەشداری پێكهاتە جیاجیاكانی خۆرئاوای كوردستان چەند كانتۆنێكی حوكمڕانی لە خۆرئاوای كوردستان لە رێگەی هەڵبژاردنەوە دامەزراند و رایگەیاند، چارەسەری ئاشتیانە و دیموكراسییانەی پرسی كورد و پێكهاتەكانی دیكەی ئەو بەشەی كوردستان تەنیا لەو رێگەیەوە دێتە دی.



لەو چوارچێوەیەوەدا، جەبار ئەمین، روونیكردەوە، بە گوێرەی ئەوەی خۆرئاوای كوردستان دابەشدەكرێت بەسەر چەند كانتۆنێكدا كە لە هەریەكێكیان سەربەخۆییەكی دیاریكراو هەیە و دەسەڵاتی ناوەند كەمتر دەبێتەوە و پرسی پێكەوەژیان و خەبات بۆ مافی ژنان و پاراستنی ژینگە وەك بنەما لەبەر چاو گیراوون، پشتگیری كردنی ئەو شێوازی كاركردنە ئەركێكی گرنگ و دیموكراتیخوازانەیە.



چاوەڕوان دەكرێت دوای دیدار و كۆبوونەوەكانی لەگەڵ لایەنە پەیوەندیدارەكانی خۆرئاوای كوردستان، ئەو پەرلەمانتارە راپۆرتێك لە بارەی رەوشی ناوچەكەوە ئامادە بكات.

ڤیدیۆ: وێرانكاری بەعسییەكان لە هەشتی شوباتدا ببینە

.: NRT.TV :.

ئێن ئاڕ تی – بەغدا: بۆ یەكەمجار دیمەنی وەزارەتی بەرگری عێراق ببینە، كە دوای گەمارۆدانی یەكەم سەرۆك كۆماری عێراق عەبدولكەریم قاسم تێیدا، تاقمی یەكەمی بەعسییەكان پەلاماریان دا و بە تانك و فڕۆكە بۆمبابارانیان كرد و سەرەنجام قاسمیان بەدیل گرت و دواتریش گولەبارانیان كرد. 

عەبدولكەریم قاسم كە عێراقییەكان بە "زەعیمی ئەوحەد" ناویاندەبرد، وەك یەكێك لە ئەفسەرانی چاوكراوەی سوپای عێراق لە بەرەبەیانی 14ی تەمموزی 1958 توانی بە گرتنی ئێستگەی بەغدا و گەمارۆدان و كوشتنی ئەندامانی بنەماڵەی پادشایەتی عێراق و فەیسەڵی دووەمی پادشا بچووكەكەی عێراق كودەتایەكی سەركەوتوانە بەسەر حوكمی پادشاییدا بكات و سیستەمی حوكم لە پادشاییەوە بكاتە كۆماری.

قاسم، كە عێراقییەكان لە بارەیەوە دەیانوت "ماكو زەعیم ئیلا كەریم"، لە ماوەی ساڵانی 1958 – 1963 وەك فریادڕەسی هەژارانی عێراق دەركەوت. چیرۆكەكانی قاسم بوونە باس و خواسی تەواوی كۆڕ و دانیشتنی هاووڵاتیانی عێراق، بە جۆرێك تا ئێستاشی لەگەڵدا بێت، هەواداری ئەو زەعیمە لە عێراق ماونەتەوە.

ئەوەی لەم گرتە ڤیدیۆییەدا بەرچاو دەكەوێت، كە یەكەمجارە بڵاو بكرێتەوە، شوێنەواری ئەو بۆمباباران و پەلامارەیە كە تاقمی یەكەمی بەعسییەكان لە بەرەبەیانی هەشتی شوباتی 1963 كردیانە سەر وەزارەتی بەرگری.

رۆژی هەشتی شوبات
كودەتاچییەكانی هەشتی شوبات، كاتژمێر 09:00ی سەر لە بەیانی رۆژی هەینی هەشتی شوباتیان وەك كای سفری دەستپێكردنی كودەتاكەیان دەستنیشان كردبوو، ئەو رۆژە هاوكات بوو لەگەڵا رۆژی 14ی رەمەزان و پشوو بوو، سوپا و هێزە ئەمنییەكان بە ئاسانی دەتوانرا جوڵەیان پێبكرێت.

یەكەیەكی سەربازی پەلاماری ناوەندی ئێستگەی بەغدای دا و دوای دەستبەسەرداگرتنی ئێستگەكە دەستیان بە پەخشكردنی سرودی جۆشهێنەری عەرەبی لەوانە سرودی "جیش العروبة یا بطل"ی ئوم كەلسوم كرد، هەروەها ئەو سرودەیان پەخشكرد كە تایبەت بوو بە شۆڕشی ئەفسەرانی ئازادیخواز و بزوتنەوەی رەشید عالی گەیلانی 1941 "لاحت رؤس الحرب تلمع بین الروابی".

لەو كاتەدا فڕۆكە شەڕكەرەكانی سوپا بە تایبەتی چەند فڕۆكەیەكی میگ 17 لە بنكەی ئاسمانی تەمموز و حەبانییەوە بە سەركردایەتی مونزیر وەنداوی و محەممەد جبوری و حەردان تكریتیش لە بنكەی ئاسمانی كەركوكەوە بە سەرپەرشتی عارف عەبدولڕەزاق هەڵیانكوتایە سەر وەزارەتی بەرگری و بە چڕی بۆمبا بارانیان كرد، دواتر بە تانك و زرێپۆش گەمارۆی وەزارەتی بەرگری درا.

بە گوێرەی گێڕانەوەی شاهێدحاڵەكانی ئەو رۆژە، زۆرێك لە هاووڵاتیانی بەغدا بۆ پاراستنی رێبەرەكەیان لە بەردەم وەزارەتی بەرگری كۆبوو بوونەوە و داوایان كردبوو زەعیم چەكیان بداتێ بەڵام ئەو رەتیكردبووەوە و داوای لێكردبوون بگەڕێنەوە ماڵەكانیان.

ژمارەیەك لە وەزیرەكانی كابینەی حكومەتی زەعیم رایانكرد و هیچ یەك لە تیپەكانی سوپای عێراق بۆ پشتیوانی لە زەعیم بەرەو بەغدا نەجوڵان و تەنیا بەرگرییەكی كەم لە حامیەی وەزارەتی بەرگری ئەنجامدرا و چەند كەسێك كە بە پەنجەی دەست هەژمار دەكران لە دەوری قاسم مانەوە. كە ئەمانە بوون: عەقید فازڵ عەباس مەهداوی سەرۆكی دادگای گەل و كوڕی خاڵی زەعیم، عەمید تەها شێخ ئەحمەد بەڕێوبەری جوڵەی سەربازی، قاسم ئەلجەنابی سكرتێری تایبەتی قاسم، مولازم كەنعان حەداد پاسەوانی تایبەتی قاسم.

لە كاتێكدا  بینای وەزارەتی بەرگری لە لایەن فڕۆكەی كودەتاچییەكانەوە بۆمباباران دەكرا، عەبدولكەریم قاسم وتارێكی بۆ گەلی عێراق تۆمار كرد و بە رائید سەعید ئەلدوریدا رەوانەی ئێستگەی بەغدای كرد، بەڵام بەهۆی گیرانی ئێستگەكەوە ئەو وتارە نەگەیشتە گوێی خەڵكی عێراق.

لە وتارەكەیدا هاتبوو: "بۆ رۆڵە بەڕێزەكانی گەل، رۆڵەكانی سوپا، هەندێ تاقمی خیانەتكار و ستەمكار و خراپەكار بە پشتیوانی و جوڵاندنیان لە لایەن ئیستعمارەوە دەیانەوێت كۆمارەكەمان وێران بكەن. بجەنگن لەگەڵیاندا بۆ ئەوەی كۆمارەكەمان سەربەرز بمێنێتەوە. كۆماری نەمری عێراق رۆڵەی شۆڕشی چواردەی تەمموزی نەمرە و نابەزێت. ئێمە لە پێناو گەلدا و بە تایبەتیش لە پێناو هەژارەكاندا كاردەكەین و كیانەكەمان بەهێز دەكەین و ئێمە نابەزین، خودامان لەگەڵە، ئەی رۆڵەكانی سوپا و یەكە تایبەتەكان و كەتیبە و سەربازە ئازاكان، خیانەتكاران بە سزا بگەیەنن و بیانكوژن، ئەوانە دەیانەوێَت كۆمارەكەمان و دەستكەوتەكانی شۆڕشەكەمان لەناو بەرن". 

لە كاتی تۆمار كردنی ئەو وتارەدا بۆمباباران زەعیم ناچار دەكات وتارەكەی بوەستێنێت و دوای دەنگی بۆمبەكان جارێكی دیكە دەست بە قسە دەكاتەوە، بەڵام بەشێكی زۆری قسەكانی بە هۆی بۆمبابارانەوە روون نین.

كودەتاچییەكان توانیان زەعیم بگرن و بە بێ هیچ دادگاییكردنێك لە ستۆدیۆی ئێستگەی بەغدا لە سێدارەیان دا.

دواتر كودەتاچییەكان ئەنجومەنێكیان بە ناوی "ئەنجومەنی نیشتمانی سەركردایەتی شۆڕش" دروست كرد كە زۆرینەیان بەعسی بوون و لە پێكهێنانی كابینەی حكومەتیشدا 12 وەزیریان بەعسی بوون و ئەوانی دیكە كەسانی سەربەخۆ و سەر بە رەوتەكانی دیكە بوون.

لە ئەنجامی ئەو كودەتایەدا تاقمی یەكەمی بەعسییەكان 1963 – 1968 جڵەوی حوكمیان گرتە دەست. و موشیر عەبدولسەلام عارف بووە سەرۆك كۆمار ، بەدوای ئەویشدا عەبدولڕەحمانی برای بووە سەرۆك كۆمار و حوكمی ئەو دوو برایە تا 1968 و هاتنی تاقمی دووەمی بەعسییەكان بە سەرۆكایەتی ئەحمەد حەسەن بەكر و سەدام حوسێن درێژەی كێشا.

ڤيديۆ


سود لە وێكپیدیا وەرگیراوە.
ئا: ئەرسەلان رەحمان

الأحد، 2 فبراير 2014

رێسا زێڕينه‌كانى نووسينى هه‌واڵ

يه‌كه‌م: كار كردن به‌ رێساى "هه‌واڵ پيرۆزه‌ و لێدوان ئازاده" كه‌‌ يه‌كێكه‌ له‌ رێسا بنچينه‌ييه‌كانى نووسينى هه‌ر نووسينێكى رۆژنامه‌وانييانه‌ى بابه‌تييانه‌ و پێويسته‌ رۆژنامه‌وان له‌ ده‌ره‌وه‌ى رووداوه‌كان بێت و خۆى نه‌بێته‌ به‌شێك له‌ رووداوه‌كان و كار له‌سه‌ر راستگۆيى له‌ گواستنه‌وه‌ى زانيارى و بابه‌ته‌كانى بكات و به‌ هيچ لايه‌كى په‌يوه‌نديدار به‌ رووداوه‌كاندا داينه‌شكێنێته‌وه‌ و دوور و نزيك بۆچوونى خۆى له‌ نووسينى بابه‌تيى ژانره‌ رۆژنامه‌وانييه‌كان نه‌خاته‌ڕوو.

دووه‌م: هيچ هه‌واڵێك بڵاو مه‌كه‌ره‌وه‌ ئه‌گه‌ر له‌ راستى و دروستى زانيارييه‌كانى دڵنيا نه‌بوويت، ياخود پشتڕاستت نه‌كردبوونه‌وه‌، له‌گه‌ڵ ئه‌وه‌شدا پێويسته‌ ئاماژه‌ به‌ سه‌رچاوه‌ى هه‌واڵه‌كان بكه‌يت و بۆ وه‌رگى روون بكه‌يته‌وه‌ ئه‌و هه‌واڵه‌ت له‌ كوێوه‌ و له‌ رێگه‌ى چييه‌وه‌ وه‌رگرتووه‌، په‌يامنێرت، نێردراووت، ئاژانسه‌كان، سه‌رچاوه‌ى ديكه‌...هتد.

سێيه‌م: هه‌وڵده‌ ئه‌و زانيارييانه‌ى بنچينه‌يين و ئه‌گه‌ر نه‌يانخه‌يته‌ڕوو پرسيار له‌ لاى وه‌رگر دروست ده‌كه‌ن، بيانخه‌ڕوو، وه‌ڵامى هيچ پرسيارێك به‌جێ مه‌هێڵه‌، به‌ تايبه‌تى ئه‌و پرسيارانه‌ى كه‌ لاى وه‌رگر درووست ده‌بن و به‌ بڵاونه‌كردنه‌وه‌يان زيان له‌ پێكهاته‌ و بنه‌ماى زانيارى هه‌واڵه‌كه‌ت ده‌ده‌يت.

چواره‌م: بايه‌خى هه‌واڵ له‌وه‌وه‌ سه‌رچاوه‌ ده‌گرێت كه‌ خودى هه‌واڵه‌كه‌ ببه‌ستييه‌وه‌ به‌ رووداوه‌ هه‌نووكه‌ييه‌كان و په‌يوه‌ستى بكه‌يته‌وه‌ به‌ ژيانى خه‌ڵكه‌وه‌، جا له‌ رێگه‌ى هه‌ر به‌هايه‌كه‌وه‌ بێت: نزيكى، مرۆيى، تازه‌يى، ...هتد.

پێنجه‌م: كورتبڕى له‌ خستنه‌ڕووى زانيارييه‌كان به‌ جۆرێك كه‌ هه‌تا بگونجێت زۆرترين زانيارى له‌ كورتترين رسته‌دا جێ بكه‌ره‌وه‌، وه‌ڵامى پرسياره‌كانى وه‌رگر به‌و په‌ڕى كورتى و پوختى بخه‌ره‌ڕوو.

شه‌شه‌م: هه‌وڵده‌ هه‌ميشه‌ له‌ دانانى ناونيشاندا و له‌ ليدى هه‌واڵدا ره‌چاوى ئه‌وه‌ بكه‌يت  وه‌ڵامى ئه‌م پرسياره‌ بده‌يته‌وه‌ (كێ چى كرد؟).

حه‌وته‌م: باشتر وايه‌ له‌ نووسينى ليد يان پێشه‌كى هه‌واڵدا به‌ ده‌قى وته‌ى گواستراوه‌ى راسته‌وخۆ ده‌ست پێ نه‌كه‌يت، مه‌گه‌ر ئه‌و وته‌يه‌ زۆر گرنگ بێت و وته‌ى كه‌سێكى ناودار و جێ بايه‌خ بێت.

هه‌شته‌م: سوور به‌ له‌سه‌ر ناوبردنى سه‌رچاوه‌كه‌ت و هيچ كات په‌نا بۆ كۆپيكردن و دزينى زانيارى مه‌به‌.

نۆيه‌م: له‌ ناوبردنى سه‌رچاوه‌كاندا په‌يڕه‌وى له‌ نه‌ريتى ئه‌مانه‌ت پارێزى بكه‌ و خۆت له‌ جياتى شاره‌زايان، پسپۆڕان، چاودێران، مامۆستايان قسه‌ مه‌كه‌ و به‌ گوێره‌ى سروشتى بابه‌ته‌كه‌ له‌ كه‌سانى نزيك و په‌يوه‌نديدار به‌ رووداوه‌كانه‌وه‌ زانيارى وه‌ربگره‌ و له‌سه‌ر بنه‌ماى پاراستنى ئاكارى رۆژنامه‌وانى ئاماژه‌ به‌ سه‌رچاوه‌كانت بكه‌.

ده‌يه‌م: با ئه‌و راستييه‌ت له‌به‌ر چاو بێت، كه‌ قاڵبه‌كانى داڕشتنى هه‌واڵ و بابه‌ته‌ رۆژنامه‌وانييه‌كان بۆ فێربوونن نه‌ك بۆ ئه‌وه‌ى توانا و سه‌ليقه‌ى خۆت له‌ تازه‌گه‌ريدا بكوژيت و ته‌نيا هه‌وڵى لاساييكردنه‌وه‌ى قاڵبه‌كان بده‌يت.

يانزه‌هه‌م: ليدى هه‌واڵ جێى به‌ بايه‌خترين زانيارييه‌ و به‌ شتى لابه‌لا له‌ بايه‌خى كه‌م مه‌كه‌ره‌وه‌ و ئه‌گه‌ر پێشه‌كيشت نووسى ئه‌وا وه‌ك چۆن سه‌ره‌تايه‌ك له‌ رووداو و داتاكانت خستوونه‌ته‌ڕوو، له‌ يادت نه‌چێت له‌ ناوه‌ڕۆكدا زانيارييه‌كان به‌ رێكوپێكى روون بكه‌ره‌وه‌.

دوانزه‌: له‌ سه‌ر كورسييه‌كه‌ت كه‌ روو به‌ كۆمپيوته‌ر دانيشتوويت قسه‌ بۆ خه‌ڵك دامه‌تاشه‌ و شتێك مه‌ڵێ كه‌ لێدوانت وه‌رنه‌گرتووه‌ و قسه‌ بۆ خه‌ڵك هه‌ڵمه‌به‌سته.

سيانزه‌: رێگه‌ بده‌ با زانيارييه‌كان خۆيان بدوێن و تۆ له‌ باتى خه‌ڵك حوكم مه‌ده‌ و ئه‌نجامى بيركردنه‌وه‌ و تێگه‌يشتنى خۆت به‌ نرخى زانيارى و هه‌واڵ به‌ خه‌ڵك مه‌فرۆشه‌وه‌.

چوارده‌: هه‌وڵ بده‌ هاوسه‌نگى بپارێزيت و نه‌ زياده‌ڕۆى بكه‌ و نه‌ چاوپۆشى بكه‌ له‌ گه‌ياندنى راستييه‌كان.

پانزه‌: سوور به‌ له‌سه‌ر ئه‌وه‌ى هه‌موو زانيارييه‌ پێويسته‌كانت خستبێته‌ڕوو، بۆ ئه‌وه‌ى 
پرسيار لاى وه‌رگر به‌ بێ وه‌ڵام نه‌مێنێته‌وه‌.

شانزه‌: هه‌وڵده‌ له‌ خستنه‌ڕووى زانيارييه‌كاندا خۆت له‌ رۆتين بپارێزيت و به‌دواى بابه‌تى جێى سه‌رنج و بايه‌خى خه‌ڵكدا بگه‌ڕێ.

حه‌ڤده‌: له‌ كاتى رووماڵكردنى كاره‌سات و رووداوه‌ سروشتييه‌كاندا مه‌هێڵه‌ هه‌ست و سۆزت له‌ خستنه‌ڕووى زانيارييه‌كاندا به‌سه‌رتدا زاڵ بن. تۆ زانيارى ده‌گوازيته‌وه‌  و هه‌ست و سۆزى خۆت پيشان مه‌ده‌.

هه‌ژده‌: جياوازى بكه‌ له‌ نێوان هه‌واڵ و رێكلام و پرۆوپاگه‌نده‌ كردن بۆ لايه‌نێك يان كه‌سێك يان ده‌زگايه‌ك، رێگه‌ مه‌ده‌ هيچ كه‌س و لايه‌نێك وه‌ك بڵيندگۆى پڕوپاگه‌نده‌ى خۆى به‌كارت بهێنێت.

نۆزده‌: ئه‌و لێدوان و زانيارييه‌ى وه‌رت گرتووه‌، به‌ شێوه‌يه‌كى زانستى بيخه‌ره‌ روو بۆ ئه‌وه‌ى وه‌رگر بزانێت ئه‌و لێدوان و زانيارييه‌ هى كێيه‌ و ئه‌گه‌ر له‌ قسه‌ و زانيارييه‌ك كه‌ پاڵ دراوه‌ته‌ پاڵ كه‌سێك دڵنيا نه‌بوويت، فه‌رامۆشى بكه‌.

بيست: هه‌وڵ بده‌ زياتر وته‌ى گواستراوه‌ى راسته‌وخۆى ناته‌واو وه‌ربگريت، كه‌ ديقه‌تى زياتره‌ له‌وه‌ى چه‌ندين دێڕ له‌ قسه‌ى كه‌سێك بنووسيته‌وه‌.

بيست و يه‌ك: خۆت دوور بگره‌ له‌ به‌كارهێنانى ئه‌و ده‌سته‌واژانه‌ى حوكمدان و لايه‌نگرييان تێدايه‌، وه‌ك تيرۆريست، فاشى، چه‌ته‌، هه‌ڵگه‌ڕاوه‌، هۆڤى، رێگر، دز، ...هتد. خۆ تۆ دادوه‌ر نيت، ئه‌وه‌ ئيشى دادگايه‌ تاوان له‌سه‌ر تۆمه‌تبار ساغ بكاته‌وه‌ و به‌و هۆيه‌وه‌ سزاى بدات.

وه‌رگيراوه‌ له‌ ماڵپه‌ڕى Arabmedia
پوخته‌كردن و وه‌رگێڕانى: ئه‌رسه‌لان ره‌حمان


رێسا زێڕينه‌كانى نووسينى هه‌واڵ

رێسا زێڕينه‌كانى نووسينى هه‌واڵ

ه‌كه‌م: كار كردن به‌ رێساى “هه‌واڵ پيرۆزه‌ و لێدوان ئازاده” كه‌‌ يه‌كێكه‌ له‌ رێسا بنچينه‌ييه‌كانى نووسينى هه‌ر نووسينێكى رۆژنامه‌وانييانه‌ى بابه‌تييانه‌ و پێويسته‌ رۆژنامه‌وان له‌ ده‌ره‌وه‌ى رووداوه‌كان بێت و خۆى نه‌بێته‌ به‌شێك له‌ رووداوه‌كان و كار له‌سه‌ر راستگۆيى له‌ گواستنه‌وه‌ى زانيارى و بابه‌ته‌كانى بكات و به‌ لاى هيچ لايه‌كى په‌يوه‌نديدار به‌ رووداوه‌كاندا داينه‌شكێنێته‌وه‌ و دوور و نزيك بۆچوونى خۆى له‌ نووسينى بابه‌تيى ژانره‌ رۆژنامه‌وانييه‌كان نه‌خاته‌ڕوو.
366122-penjournalistwriterreporter-1334709441-195-640x480
دووه‌م: هيچ هه‌واڵێك بڵاو مه‌كه‌ره‌وه‌ ئه‌گه‌ر له‌ راستى و دروستى زانيارييه‌كانى دڵنيا نه‌بوويت، ياخود پشتڕاستت نه‌كردبوونه‌وه‌، له‌گه‌ڵ ئه‌وه‌شدا پێويسته‌ ئاماژه‌ به‌ سه‌رچاوه‌ى هه‌واڵه‌كان بكه‌يت و بۆ وه‌رگى روون بكه‌يته‌وه‌ ئه‌و هه‌واڵه‌ت له‌ كوێوه‌ و له‌ رێگه‌ى چييه‌وه‌ وه‌رگرتووه‌، په‌يامنێرت، نێردراووت، ئاژانسه‌كان، سه‌رچاوه‌ى ديكه‌…هتد.
سێيه‌م: هه‌وڵده‌ ئه‌و زانيارييانه‌ى بنچينه‌يين و ئه‌گه‌ر نه‌يانخه‌يته‌ڕوو پرسيار له‌ لاى وه‌رگر دروست ده‌كه‌ن، بيانخه‌ڕوو، وه‌ڵامى هيچ پرسيارێك به‌جێ مه‌هێڵه‌، به‌ تايبه‌تى ئه‌و پرسيارانه‌ى كه‌ لاى وه‌رگر درووست ده‌بن و به‌ بڵاونه‌كردنه‌وه‌يان زيان له‌ پێكهاته‌ و بنه‌ماى زانيارى هه‌واڵه‌كه‌ت ده‌ده‌يت.
چواره‌م: بايه‌خى هه‌واڵ له‌وه‌وه‌ سه‌رچاوه‌ ده‌گرێت كه‌ خودى هه‌واڵه‌كه‌ ببه‌ستييه‌وه‌ به‌ رووداوه‌ هه‌نووكه‌ييه‌كان و په‌يوه‌ستى بكه‌يته‌وه‌ به‌ ژيانى خه‌ڵكه‌وه‌، جا له‌ رێگه‌ى هه‌ر به‌هايه‌كه‌وه‌ بێت: نزيكى، مرۆيى، تازه‌يى، …هتد.
پێنج: كورتبڕى له‌ خستنه‌ڕووى زانيارييه‌كان به‌ جۆرێك كه‌ هه‌تا بگونجێت زۆرترين زانيارى له‌ كورتترين رسته‌دا جێ بكه‌ره‌وه‌، وه‌ڵامى پرسياره‌كانى وه‌رگر به‌و په‌ڕى كورتى و پوختى بخه‌ره‌ڕوو.
شه‌شه‌م: هه‌وڵده‌ هه‌ميشه‌ له‌ دانانى ناونيشاندا و له‌ ليدى هه‌واڵدا ره‌چاوى ئه‌وه‌ بكه‌يت وه‌ڵامى ئه‌م پرسياره‌ بده‌يته‌وه‌ (كێ چى كرد؟).
حه‌وته‌: باشتر وايه‌ له‌ نووسينى ليد يان پێشه‌كى هه‌واڵدا به‌ ده‌قى وته‌ى گواستراوه‌ى راسته‌وخۆ ده‌ست پێ نه‌كه‌يت، مه‌گه‌ر ئه‌و وته‌يه‌ زۆر گرنگ بێت و وته‌ى كه‌سێكى ناودار و جێ بايه‌خ بێت.
هه‌شت: سوور به‌ له‌سه‌ر ناوبردنى سه‌رچاوه‌كه‌ت و هيچ كات په‌نا بۆ كۆپيكردن و دزينى زانيارى مه‌به‌.
نۆ: له‌ ناوبردنى سه‌رچاوه‌كاندا په‌يڕه‌وى له‌ نه‌ريتى ئه‌مانه‌ت پارێزى بكه‌ و خۆت له‌ جياتى شاره‌زايان، پسپۆڕان، چاودێران، مامۆستايان قسه‌ مه‌كه‌ و به‌ گوێره‌ى سروشتى بابه‌ته‌كه‌ له‌ كه‌سانى نزيك و په‌يوه‌نديدار به‌ رووداوه‌كانه‌وه‌ زانيارى وه‌ربگره‌ و له‌سه‌ر بنه‌ماى پاراستنى ئاكارى رۆژنامه‌وانى ئاماژه‌ به‌ سه‌رچاوه‌كانت بكه‌.
ده‌: با ئه‌و راستييه‌ت له‌به‌ر چاو بێت، كه‌ قاڵبه‌كانى داڕشتنى هه‌واڵ و بابه‌ته‌ رۆژنامه‌وانييه‌كان بۆ فێربوونن نه‌ك بۆ ئه‌وه‌ى توانا و سه‌ليقه‌ى خۆت له‌ تازه‌گه‌ريدا بكوژيت و ته‌نيا هه‌وڵى لاساييكردنه‌وه‌ى قاڵبه‌كان بده‌يت.
يانزه‌: ليدى هه‌واڵ جێى به‌ بايه‌خترين زانيارييه‌ و به‌ شتى لابه‌لا له‌ بايه‌خى كه‌م مه‌كه‌ره‌وه‌ و ئه‌گه‌ر پێشه‌كيشت نووسى ئه‌وا وه‌ك چۆن سه‌ره‌تايه‌ك له‌ رووداو و داتاكانت خستوونه‌ته‌ڕوو، له‌ يادت نه‌چێت له‌ ناوه‌ڕۆكدا زانيارييه‌كان به‌ رێكوپێكى روون بكه‌ره‌وه‌.
دوانزه‌: له‌ سه‌ر كورسييه‌كه‌ت كه‌ روو به‌ كۆمپيوته‌ر دانيشتوويت قسه‌ بۆ خه‌ڵك دامه‌تاشه‌ و شتێك مه‌ڵێ كه‌ لێدوانت وه‌رنه‌گرتووه‌ و قسه‌ بۆ خه‌ڵك هه‌ڵمه‌به‌سته.
سيانزه‌: رێگه‌ بده‌ با زانيارييه‌كان خۆيان بدوێن و تۆ له‌ باتى خه‌ڵك حوكم مه‌ده‌ و ئه‌نجامى بيركردنه‌وه‌ و تێگه‌يشتنى خۆت به‌ نرخى زانيارى و هه‌واڵ به‌ خه‌ڵك مه‌فرۆشه‌وه‌.
چوارده‌: هه‌وڵ بده‌ هاوسه‌نگى بپارێزيت و نه‌ زياده‌ڕۆى بكه‌ و نه‌ چاوپۆشى بكه‌ له‌ گه‌ياندنى راستييه‌كان.
پانزه‌: سوور به‌ له‌سه‌ر ئه‌وه‌ى هه‌موو زانيارييه‌ پێويسته‌كانت خستبێته‌ڕوو، بۆ ئه‌وه‌ى پرسيار لاى وه‌رگر به‌ بێ وه‌ڵام نه‌مێنێته‌وه‌.
شانزه‌: هه‌وڵده‌ له‌ خستنه‌ڕووى زانيارييه‌كاندا خۆت له‌ رۆتين بپارێزيت و به‌دواى بابه‌تى جێى سه‌رنج و بايه‌خى خه‌ڵكدا بگه‌ڕێ.
حه‌ڤده‌: له‌ كاتى رووماڵكردنى كاره‌سات و رووداوه‌ سروشتييه‌كاندا مه‌هێڵه‌ هه‌ست و سۆزت له‌ خستنه‌ڕووى زانيارييه‌كاندا به‌سه‌رتدا زاڵ بن. تۆ زانيارى ده‌گوازيته‌وه‌ و هه‌ست و سۆزى خۆت پيشان مه‌ده‌.
هه‌ژده‌: جياوازى بكه‌ له‌ نێوان هه‌واڵ و رێكلام و پرۆوپاگه‌نده‌ كردن بۆ لايه‌نێك يان كه‌سێك يان ده‌زگايه‌ك، رێگه‌ مه‌ده‌ هيچ كه‌س و لايه‌نێك وه‌ك بڵيندگۆى پڕوپاگه‌نده‌ى خۆى به‌كارت بهێنێت.
نۆزده‌: ئه‌و لێدوان و زانيارييه‌ى وه‌رت گرتووه‌، به‌ شێوه‌يه‌كى زانستى بيخه‌ره‌ روو بۆ ئه‌وه‌ى وه‌رگر بزانێت ئه‌و لێدوان و زانيارييه‌ هى كێيه‌ و ئه‌گه‌ر له‌ قسه‌ و زانيارييه‌ك كه‌ پاڵ دراوه‌ته‌ پاڵ كه‌سێك دڵنيا نه‌بوويت، فه‌رامۆشى بكه‌.
بيست: هه‌وڵ بده‌ زياتر وته‌ى گواستراوه‌ى راسته‌وخۆى ناته‌واو وه‌ربگريت، كه‌ ديقه‌تى زياتره‌ له‌وه‌ى چه‌ندين دێڕ له‌ قسه‌ى كه‌سێك بنووسيته‌وه‌.
بيست و يه‌ك: خۆت دوور بگره‌ له‌ به‌كارهێنانى ئه‌و ده‌سته‌واژانه‌ى حوكمدان و لايه‌نگرييان تێدايه‌، وه‌ك تيرۆريست، فاشى، چه‌ته‌، هه‌ڵگه‌ڕاوه‌، هۆڤى، رێگر، دز، …هتد. خۆ تۆ دادوه‌ر نيت، ئه‌وه‌ ئيشى دادگايه‌ تاوان له‌سه‌ر تۆمه‌تبار ساغ بكاته‌وه‌ و به‌و هۆيه‌وه‌ سزاى بدات.
وه‌رگيراوه‌ له‌ ماڵپه‌ڕى Arabmedia
پوخته‌كردن و وه‌رگێڕانى: ئه‌رسه‌لان ره‌حمان