شیلان شۆڕش كێ بوو.. وردەكاری ژیان و مەرگی ناوادەی
 وارڤین – نەرویژ: رۆژی (18ى ئایار)، بۆ چالاكانی ژن رۆژێكی كارەساتبار بوو، لەو رۆژەدا یەكێك لە هاوڕێ و رێبوارانی رێگەی گەیشتن بە یەكسانی پرسی ژن لە نێو ماڵەكەیدا دوای به‌رزبوونه‌وه‌ى دوكه‌ڵ له ماڵه‌كه‌يدا، ژیانی لەدەستدا، ئەو چالاكە (شیلان شۆڕش)ی تەمەن (39 ساڵ) بوو، مەرگی لەناكاوی ئەو وێڕای ئەوەی هەمووانی تووشی شۆك كرد، هێندەش گوماناوی بوو. لە سلێمانیەوە بۆ بێرگن (شیلان شۆڕش)، ناوی راستەقینەی (شیلان رەشید)ە، بە رەچەڵەك خەڵكی شاری سلێمانیە، ساڵی (1974) لەدایكبووە. وەك خۆی لە فیستیڤاڵی پاریسی بەدرخان، لە وتارێكدا رایگەیاند، ئەو كچی خێزانێكی هەژارە و بە هەژاری خۆی پێگەیاندووە، ئازادانە بیر دەكاتەوە، لە بەرامبەر هیچ شتێكدا سازش لەسەر ماف و ئازادی ژن ناكات. رۆژی (18 / ئایار – مایۆ / 2013)، لە ماڵەكەی خۆی لە شاری بێرگنی وڵاتی نەرویژ بە هۆكارێكى ناديار ژیانی لەدەستدا. چالاكی بواری پرسەكانی ژن (هانا عەلی)، كە هاوڕێی نزیكی (شیلان) بووە و هەمیشە پەیوەندی لەگەڵیدا هەبووە، وەك یەكەم كەسێك لە رێگەی واڵی خۆی لە تۆڕی كۆمەڵایەتی فەیسبووك، هەم سۆراغی هەواڵی مەرگی هاوڕێكەی دەكرد و هەمیش لە بارەیەوە زانیاری بڵاو دەكردەوە. لە لێدوانێكی تایبەت بۆ (وارڤین)، (هانا عەلی) گوتی: "شیلان لە ساڵی (1998)ەوە هەرێمی كوردستانی بەرەو وڵاتی نەرویژ بەجێهێشتووە و وەك ژنێكی ئازا و ئازاد لە بواری مافەكانی ژن دەستیداوەتە چالاكی". (شیلان) لە نەرویژ، كاری رێكخراوەیی دەستپێدەكات و بە هاوكاری ژمارەیەك چالاكی بواری یەكسانی و مافەكانی ژن رێكخراوێك دادەمەزرێنێت و دەبێتە سكرتێری رێكخراوەكە. ژنێكی كارا لە ماوەی مانەوەی لەو وڵاتەدا، وەك (هانا عەلی)ی هاوڕێی باسیكرد، چەندین وتار و بابەتی نووسیوە و لە كۆڕ و كۆبوونەوەكانی ژنان بەشدارییەكی چالاكانەی هەبووە و وەك چالاكێكی كارامەش چەندین كۆڕ و وێركشۆپ و سمیناری كراوەی بۆ ژنان رێكخستووە.  (هانا) لە بارەیەوە دەڵێت: "شیلان ئێكجار قسە خۆش و روو خۆش بوو، ژنێكی زۆر سادە و بێ غروور بوو. هەروەها زۆر زۆر هاوڕێ و دۆستانی خۆی خۆشئەویست زۆر راستگۆ و بێ گرێ و گۆڵ بوو". هەرچەندە (شیلان) ژیانی هاوسەرگیری پێكنەهێنابوو، بەڵام هەمیشە مشووری ئەو ژنانەی دەخوارد، كە لەناو خێزانەكانیان رووبەڕووی توندوتیژی دەبوونەوە و هەوڵی چارەسەركردنی كێشەكانیانی دەدا. (هانا)، هەرچەندە لە كەندا دەژیت و لە رووی شوێنییەوە لە (شیلان) دوور بووە، بەڵام لە رێگەی تۆڕی كۆمەڵایەتییەكان و تەكنۆلۆژیاوە بەردەوام پەیوەندیان لەگەڵ یەك هەبووە و وەك خۆی باسی دەكات، ئەوان هاوڕێی راز و نیازی یەك بوونە و لەو بارەیەوە گوتی: "ئەوەی من و شیلانی كۆ دەكردەوە شتگەلێكی زۆر بوون، تێڕوانینەكانمان بۆ دونیا، بۆ ئایندە بۆ ژن بوون لە وڵاتی ئێمە و تا دەگاتە چۆنێتی هەڵسوكەوت و هەرا كردنی شێتانەمان. من و شیلان یەكەمجار، كە قسەمان كرد دەستمان دایە گاڵتەی هاوڕێیانە و زۆر كراوە بووین لەگەڵ یەكدیدا و زۆر شتی ژیانی تایبەتی و گشتیمان لە گەڵ یەك باس دەكرد". گومانەكان مەرگی لەناكاوی (شیلان شۆڕش)، لەگەڵ خۆیدا چەندین گومانی درووستكردووە. هەندێك باس لەوە دەكەن چەند رۆژێك پێش كارەساتەكە، (شیلان)، فەیسبووكەكەی داخستووە. هەندێكیش باس لەوە دەكەن، شیلان لەلایەن ژمارەیەك كەسی كۆنەپارێزەوە هەەشەی لێكراوە. لە بارەی مەرگی (شیلان)ەوە، ماڵپەڕی (بەهاری كورد) بابەتێكی (مەریوان هەڵەبجەیی) بڵاو كردووەتەوە و تێیدا (مەریوان) هەندێك زانیاری لە بارەی ئەو رۆژەی تێیدا (شیلان) ژیانی لەدەستدا خستووەتەڕوو. لە بابەتەكەیدا (هەڵەبجەیی) نووسیویەتی: "شیلاخ خان، لە رۆژی گیانلەدەستدانیدا، سەرلەبەیانی لەگەڵ كەسوارەكەیدا بووەو ڕێككەوتوون كە پێكەوە ئەو رۆژە بە خۆشی بگوزەرێنن، بەم هۆیەوە گۆشت و خواردنیان ئامادەكردووە بڕیاریان داوە لەماڵی یەكێك لە ئەندامانی خێزانەكەی نان بخۆن و دواتر كاتژمێر یانزە بۆ دوانزەی نیوەڕۆ، مۆڵەتی لە كەسوكارەكەی وەرگرتووە تا بگەڕێتەوە بۆ ماڵەكەی خۆی بۆ ئەوەی خواردن بدات بە پشیلەكانی كەوەك هاوڕێیەكی زۆر نزیك خۆشیویستوون و ئینجا بگەڕێتەوە بۆلایان". مۆبایلی پێ نەبووە بەگوێرەی زانیارییەكانی (مەریوان هەڵەبجەیی)، بەر لە چوونەوەی بۆ ماڵی خۆیان (شیلان)، مۆبایلەكەی لەماڵی باوكی بیر چووەو بەبێ تەلەفۆن بەرەو ماڵەكەی خۆی بەڕێكەوتووه، كەسوكارەكەی نزیكەی دوو كاتژمێر چاوەڕوانیان كردووە بەڵام ئەو هەر نەگەڕاوەتەوە، زانیویشیانە كە مۆبایلەكەی جێهێشتووە، بۆیە یەك دوو كەس لە خێزانەكە دەچن بە شوێنیداو دەگەنە ماڵەكەی، پاش چەندین جار تەقەی دەرگاو هەوڵ و هەواڵ پرسین، هیچیان دەستگیر نەبووەو گەڕاونەتەوه".  نەزانینی هەواڵی (شیلان) باوكی ناچار كردووە، كوڕەكانی بنێرێت بۆ سۆراغی هەواڵی كچەكەی، نزیكەی كاتژمێر حەوتی سەرلە ئێوارە بۆ جارێكی گەڕاونەتەوە بۆ ماڵی شیلان تا سۆراغێكی بزانن، دەبین دووكەڵى سپى لە ماڵەكەی شیلان دێتە دەرەوەو ئۆتۆمبێلی ئاگر كوژاندنەوەو پۆلیس لەوێن و پۆلیس تەرمەكەیان دەرهێناوە. پۆلیسی نەرویژ لە بارەی ژيان له‌ده‌ستدانى (شیلان)ەوە هیچ زانیاریەكیان بڵاو نەكردووەتەوە و تێبینیكراوە، ماڵەكەی شیلان نەسووتاوە و تا ئێستا وەك رێككارێكی یاسایی پۆلیس ئیفادەی لە (10) كەس وەرگرتووە. كاردانەوەكان ژنانی چالاك و دۆست و هاوڕێیانی شیلان لە رێگەی تۆڕە كۆمەڵایەتییەكانەوە بە تایبەتی (فەیسبووك) هەریەك بە جۆرێك خەم و پەژارەی خۆی بۆ مەرگی ناوادەی (شیلان شۆڕش) دەربڕیوە. لە بارەی مەرگی هاوڕێكەیەوە، (هانا عەلی) بۆ (وارڤین) گوتی: "مەرگی شیلان بۆ من ئازارێكە دەزانم كەم كەس لێی تێدەگات، رەنگە كەسێك پێی وابێت من و شیلان زۆر جار یەكترمان بینیوەو زۆر دەمێكە یەكتر دەناسین، لە راستیدا وا نیە، من و شیلانی جوانە مەرگ تەنها سێ ساڵە یەكترمان ناسی و هەموو هاوڕێەتیمان تەنیا لە یاهوو ماسنجەر و تەلەفۆن بوو". كەسایەتی ژنی كورد و چالاك لە بواری جێندەردا (هۆزان مەحمود) وێڕای بڵاوكردنەوەی وێنەیەكی یادگاری كە لە مانگی نۆڤەمبەری ساڵی (2011) بەیەكەوە لە (بێرگن) گرتوویانە، لە واڵی خۆی نووسیویەتی: "دڵم ژانی كرد بۆ مەرگی شیلان شۆڕش، ژنە چالاكوان و بوێری كورد. زۆر بەداخم و ئێستا دەڵێم خۆزگە نەمبینیتایە شیلان گیان، لانی كەم دەموت نەمدیوە...".  نووسەر و چالاكی پرسی مافەكانی ژنی كورد، (كەژاڵ نووری) بەهەمان شێوە پەژارەی خۆی دەربڕیوە و گلەیشی لە میدیای كوردی كردووە، كە وەك پێویست بایەخیان بە مەرگی ئەو ژنە چالاكە نەداوە و لە واڵی خۆی نووسیویەتی: "جێگای ئەوەیە بپرسم، سەیر نییە لە پێگەی ئەلەكترۆنی رۆژنامە و سایت و گۆڤارەكاندا هەواڵی سوتان و مردنی ماڵ و جەستەی شیلان شۆڕش هەتا ئێستا بڵاونەكراوەتەوە؟". ئا: ئه‌رسه‌لان ره‌حمان. |
ليست هناك تعليقات:
إرسال تعليق