پەیمان حوسێن: با هەموومان بەرەنگاری ئەو تاوانە ببینەوە
03:51:11/10/2013 |
 وارڤین – كەركووك: كوژرانی ژنێك و سەربڕین و فڕێدانی جەستەكەی لە نزیك بنكەیەكی پۆلیس لەناو جەرگەی شاری كەركووكدا، چالاكانی پرسی ژنی لە كەركووك تووشی شۆك كردووە و لە درێژەی كاردانەوەكاندا بەرامبەر ئەو تاوانە چالاكی پرسی ژن لە كەركووك پەیمان حوسێن پەیامێكی ئاراستەی ژنان و رایگشتی كرد. شەوی دووشەممە - سێشەممە 7 - 8ی تشرینی یەكەم – ئۆكتۆبەری 2013 هێزەكانی پۆلیس لە نزیك گەراجی لەیلان لە گەڕەكی موسەڵڵای كەركووك تەرمی ژنێكیان دۆزیەوە، كە وێڕای كوژرانی جەستەی شێوێندرابوو، بە تەور سەری لە جەستەی جیاكرابوویەوە. بە گوێرەی زانیاری پۆلیس بۆ وارڤین لە لێكۆڵینەوەی سەرەتاییدا دەركەوتووە ئەو ژنە كە تەمەنی لە نێوان 17 تا 20 ساڵە بە تەور كوژراوە و بەهۆی ئەوەی ئەڵقەی هاوسەرگیری لە پەنجەیدا بووە، زانراوە كە چووەتە ناو ژیانی هاوسەرگیرییەوە". ئەو تاوانە ناڕەزایەتی رێكخراوەكانی ژنان و چالاكانی بەدوای خۆیدا هێناوە و بەرپرسانی ئیداری پارێزگای كەركووكیش تا ئێستا بێدەنگیان هەڵبژاردووە. لەو چوارچێوەیەدا، بەرپرسی رێكخراوی ژنانی پارتی پارێزگاران و چالاكی پرسی ژن لە شاری كەركووك پەیمان حوسێن لە پەیامێكدا كە ئاراستەی رایگشتی و ژنانی كردووە، نووسیویەتی: تاكەی رۆژانە چیرۆكەكانی قوربانیانی دەستی توندوتیژی ببیستسن و ببینین، هەواڵەكانی كوشتن و خۆكوشتن و ئازاردان و دەستدرێژی بە هەموو جۆرەكانیەوە هەموو سنوورێكی بەزاندووه، بە تایبەتی لە سنووری پارێزگای كەركووكدا هەروەها دوایكردووه، كە ژنان یەكهەڵوێست بن و بەیەكەوە بەرەنگاری ئەو توندوتیژیانە ببنەوەوە و لە پەیامەكەیدا نووسیویەتی: با بەهەموومانە بەرەنگاری ئەو تاوانە ببینەوە كە دژ بە مرۆڤایەتی دەكرێت، تاكەی ویژدانمان نوستبێت؟ با چیدی رێگە نەدەین نائارامی دەروونی تاكەكان داگیر بكات چونكە لەم توندوتیژییەدا بە تەنیا ژنان زەرەرمەند نین، بەڵكو كۆمەڵگە بە گشتی ئیفلیج دەكات با دەنگی ژنان و رۆشبیران و مرۆڤدۆستان یەك بخەین لە پێناو ژیانێكی یەكسان و دادپەروەر و دوو لە هەر توندوتیژییەك. پەیمان حوسێن لە بارەی رێككارە پێویستییەكانی بەرەنگاربوونەوەی ئەو توندوتیژیانەش دەڵێت: پێویستە فشار بخرێتە سەر ئەنجومەنی نوێنەران بۆ داڕشتنی یاسایەك بۆ بەرەنگاربوونەوەی توندوتیژی و گۆڕینی پرۆگرامی خوێندن كە بەهای مرۆڤایەتی و یەكسانی تێدا بەرجەستە بێت و هەندێ لە و بەندوماددانەی یاساكانی سزادانی عێراقی و و باری كەسێتی گۆڕانكاریان تێدا بكرێت. ئا: ئه‌رسه‌لان ره‌حمان |
ليست هناك تعليقات:
إرسال تعليق