الاثنين، 4 مارس 2013

هه‌ولێر:كچێك بە دەمانچەی باوكی ژیانی لەدەستدا

هه‌ولێر:كچێك بە دەمانچەی باوكی ژیانی لەدەستدا

11:42:04/03/2013
وارڤین – هەولێر: (رووخسار سەلاح عەبدی)ی تەمەن بیست ساڵ، بە دەمانچەی باوكی، كە كارمەندی ئاسایشە، كۆتایی بە ژیانی هات و لێكۆڵینەوە لە هۆكاری ژیان لەدەستدانی دەستیپێكردووە و باوكی دەڵێت هۆكارەكە خۆكوژی بووە.

بەرەبەیانی دوێنێ یەكشەممە (3 / ئازار – مارس / 2013)، كاتژمێر (6:40) خولەكی بەیانی، لە گوندی (بەرحوشتر)، سەر بە شارەدێی (بەحركە)، هەڵكەوتوو لە سنووری شارۆچكەی (خەبات)، (رووخسار سەلاح عەبدی) لەدایكبووی (1993)، بە فیشەكی دەمانچە ژیانی لەدەستدا.

پۆلیس، دوای ئاگاداركردنەوەیان، گەیشتنە شوێنی رووداوەكە، باوكی (رووخسار) بۆ پۆلیس گوتویەتی: "كچەكەم بە دەمانچەكەی من خۆی كوشتووە".

بە گوێرەی زانیارییەكانی (وارڤین)، پێش (3) مانگ، دایكی (رووخسار) كۆچی دوایی كردووە و ئەركی ماڵ و بارهێنانی خوشك و براكانی كەوتووەتە ئەستۆی، هەر ئەمەش وایكردووە، لە پۆلی شەشەمی ئامادەیی دەست لە خوێندنەكەی هەڵبگرێت و خۆی بۆ كاروباری ناوماڵ تەرخان بكات.

لە لێدوانێكی تایبەت بۆ (وارڤین)، بەڕێوبەری بەڕێوبەرایەتی بەرەنگاربوونەوەی توندوتیژی لە هەولێر رائید (ژیلەمۆ عەبدولقادر) رایگەیاند، لێكۆڵینەوە دەستیپێكردووە و تەرمی كچەكە گواستراوەتەوە بۆ پزیشكی دادوەری هەولێر و تا ئێستا روون نییە، هۆكاری ئەو رووداوە چی بووە.

تاوانەكانی كوشتنی ژن و خۆكووشتن بەو چەكانەی كە لەناو ماڵاندا بڵاو بوونەتەوە و لە كاتی پشوودا، هێزە ئەمنییەكان دەیبەنەوە بۆ ماڵ، تا دێت زیاتر دەبن و رۆژی پێنجشەممەی رابردووش، كەسێكی ئەندامی هێزە ئەمنییەكانی زێڕەڤانی لە گەڕەكی تەیراوەی شاری هەولێر، بەو چەكەی لە كاتی دەوامی رەسمیدا ئەركی پێ رادەپەڕێنێت، هاوسەرەكەی خۆی كوشت.

لە هەرێمی كوردستاندا، هێزە ئەمنییەكانی (پێشمەرگە، ئاسایش، زێڕەڤانی، پۆلیس، پۆلیسی هاتوچۆ، كادیرانی حزبی، بەرپرسانی حزبی، پاسەوانی بەرپرسان، كۆمپانیا ئەمنییەكان)، لەدوای كاتی دەوام و لە كاتی مۆڵەت خواستن و پشوویدا چەكەكانیان لەگەڵ خۆیان لە شوێنی ئەركیانەوە دەبەنەوە ماڵ و ئەمەش بووەتە هۆی روودانی دەیان حاڵەتی تاوانكاری.

لەو بارەیەوە (وارڤین) پەیوەندیكرد، بە ژمارەیەك ئەندامی هێزە ئەمنییەكان و ئەوان روونیانكردەوە، تا ئێستا وەزارەتی ناوخۆی حكومەتی هەرێم، هیچ بڕیار و رێنماییەكی بۆ قەدەغەكردنی بردنە دەرەوەی چەك لە شوێنی كاركردن دەرنەكردووە.

بە گوێرەی زانیارییەكان تێبینیكراوە، بەشێك لە حاڵەتەكانی توندوتیژی دژ بە ژنان و كوشتنی ژندا، ئەنجامدەرانیان پیاوانی ئەندامی هێزە ئەمنییەكانن.

پێشتر  دەزگای وارڤین بۆ پرسەكانی ژن، لە راپرسییەكی بەرفراواندا، هۆشداریدایە لایەنە رەسمییەكان لە بارەی بڵاوبوونەوەی زیاتر لە یەك ملیۆن پارچە چەكی سووك و قورس لە سێ پارێزگای هەرێمدا و  لە بارەی پەیوەندی چەك بە توندوتیژی دژ بە ژنانەوە، بە رێژەی (%75)ی بەشدارانی راپرسیەكە رایانگەیاندووە چەك پەیوەندییەكی راستەوخۆی بەو پرسەوە هەیە و (%85)ی بەشداربووانیش رایانگەیاندبوو، پێویستە هەنگاوی جدی بنرێت بۆ نەهێشتنی چەك لە ماڵان و بەدەستی خەڵكەوە.

ئا: ئه‌رسه‌لان ره‌حمان

ليست هناك تعليقات: