چوار ساڵە ژنێك بێسەروشوێنەو بنەماڵەكەشی رەخنە لەدەزگا ئەمنییەكان دەگرن
 حه‌نيفه مه‌جروم چوار ساڵه بێ سه‌روشوێنه وارڤین – هەولێر: (حەنیفە مەجروم) تەمەن (28 ساڵ)، رۆژێك پێش جەژنی رەمەزانی (2008) لە بەردەم نەخۆشخانەی شەقڵاوە رفێندراوە و لەو رۆژەوە تا ئێستا بێ سەروشوێنە و بنەماڵەكەشی بەرپرسیارێتی شوێنبزربوونی كچەكەیان دەخەنە ئەستۆی دەزگا ئەمنییەكانی پارتی دیموكراتی كوردستان و داوا دەكەن، دەزگا پەیوەندیدارەكانی حزب و حكومەت بە بوون و نەبوون وەڵامیان بدەنەوە. حەنیفە كێیە (حەنیفە مەجروم جەمیل) لەدایكبووی (1980)، دانیشتووی گوندی ئەسپیندارەی سەر بە شارەدێی هیرانی سەر بە شارۆچكەی شەقڵاوەیە. ئەو وەك پەرستار لە نەخۆشخانەی گشتی شەقڵاوە دەوامی فەرمی كردووە و لە رووی كاری رێكخراوەیشەوە، ئەندامی چالاكی یەكێتی ئافرەتانی كوردستان و یەكێتی لاوانی دیموكراتی كوردستان بووە كە هەردوو رێكخراوەكە ئۆرگانی پارتی دیموكراتی كوردستانن، یەكێك لە براكانیشی دەڵێ: "خوشكەكەم پەیوەندی بە مەسیفەوە هەبووە" وەك ئاماژەیەك بۆ ئەندام بوونی لە دەزگای پاراستنی پارتی دیموكراتی كوردستان، كە دواتر لەگەڵ دەزگای زانیاری یەكێتی نیشتمانی كوردستان لە بۆتەی ئەنجومەنێكدا یەكخراوون. ئەو كچە پەرستارە، خوێندنی سەرەتایی و ناوەندی لە گوندەكەی خۆیان و شەقڵاوە تەواو كردووە و وەك كچە ئەندامێكی (پارتی) لە كۆڕ و كۆبوونە و چالاكییە حزبییەكاندا بەشدارییەكی كارای هەبووە. (پارتی) بوون، لە لای ئەندامانی بنەماڵەی (حاجی مەجروم) وەك میراتێك لە باوكەوە بۆ منداڵەكانی ماوەتەوە، چونكە وەك (خەلیل)ی برای (حەنیفە) گوتی: "ئێمە هەموومان بە عائیلە پارتیین و بابمان پێشمەرگەی شۆڕشی ئەیلوول بووە". شۆڕشی ئەیلوول؛ لە یانزەی ئەیلوولی (1961) هەڵگیرساوە و تا ئازاری (1975) بەردەوامی هەبووە و ناوچە شاخاوییەكانی هەرێمی كوردستان بەدەست هێزەكانی پێشمەرگەوە بوونە، كە (حاجی مەجروم) لە دایكبووی (1934)یش یەكێك لەو پێشمەرگانە بووە و گوندەكەشیان هەر لە ژێر دەسەڵاتی شۆڕشدا بووە و ئەو بەشداری شەڕەكانی (لۆلان و بێركمە)ی كردووه، كە پێشمەرگە لە دژی سوپای عێراق ئەنجامیانداوە. كوڕەكانی (حاجی مەجروم)، وەك باوكیان چەكیان كردووەتە شان و لە ریزی هێزە ئەمنییەكانی پارتی دیموكراتی كوردستاندان و (حەنیفە)ی كچیشی وەك ئەوان، كاری رێكخراوەیی و رێكخستنی بۆ ئەو حزبە كردووە و لە ناوچەی شەقڵاوە بە پلەی "كادیر" كاری حزبیی كردووە. حەنیفە چی لێهات (خەلیل مەجروم) لەدایكبووی (1984) برای بچوكی (حەنیفە)یە، بە هەناسەیەكی ساردەوە، دەڵێ "ئەمەش دەمانەوێت بزانیین حەنیفە چی لێهات، عارد قوتی دا، ئاسمان هەڵیكێشا، كوو لە جێیەكی گچكەی وەكی شەقڵاوەی كچەك بێسەروشوێن دەبیت؟". "لە ساڵی (2000)ەوە باوكم لە گوندەكەی خۆمان، (ئەسپیندارە) ژیان بەسەر دەبات، ئێمە چوار برا و دوو خوشكین، (حەنیفە)ی خوكشم هەفتەك لە دەوام بوو، هەفتەك لە ماڵ بوو، ئەو كاتیش لەلای باووكم دەمایەوە"، (خەلیل) گوتی. بە گوێرەی نەریتی زۆرێك لەو خێزانانەی دوو بنەیان هەیە، واتە بنەیەكیان لە شار و یەكیان لە لادێیە، لە مەراسیمە گرنگەكاندا روودەكەنەوە بنەی سەرەكی، بەگوێرەی نەریتی كۆمەڵگەی باوكسالاری ئەو بنەیەش سەرەكییە، كە باوك لێی جێگیرە. براكانی (حەنیفە)، لە هەولێر نیشتەجێ بوونە و ئەوان وەك ئەركی باوك و فەرزندەیی پێویست بوو، رۆژێك پێش جەژنی رەمەزان بگەڕێنەوە بۆ لای باوكیان و لە بنەی سەرەكی و لەناو خزم و كەسی زێدەكەی خۆیاندا واتە (ئەسپیندارە) جەژن بكەن. (خەلیل) گوتی: "خوشكم بە مۆبایل پەیوەندی پێوەكردین، بە برا گەورەكەمی وت، وەرنەوە بۆ ئەسپیندارە و دەمەوێت ئەم جەژنە من جلوبەرگی جوان بۆ منداڵەكان بكڕم و ئێوە هیچ مەكڕن، بە ماڵەوەشم وتووە، ئێوارە، كە هاتمەوە هەموو شت لەگەڵ خۆم دەهێنمەوە، ئێستا لە دەوامم، هەر كە تەواو بووم دەچمە بازار و كەلوپەل دەكڕم و دێمەوە". وەك ئەو گوتی: "ئەمە دوا قسەی حەنیفە بووە بۆ براكانی". دەنگی نەبوو بە گوێرەی گێڕانەوەی (خەلیل)، ئێوارەی (28 / ئەیلوول – سێپتێمبەر / 2008) لە رێگەی چوونیان بۆ شەقڵاوە، لەلایەن ماڵەوەیان ئاگاداركراونەتەوە، كە (حەنیفە) وەڵامی نییە، ئەمانیش پەیوەندی پێوەدەكەن، بەڵام بێسوود دەبێت و مۆبایلی داخراو دەبێت، تا دواجار، شەو كاتژمێر (11)ی شەوی جەژن، پەیوەندییان پێوە دەكرێت بە ژمارەی (حەنیفە)، بەڵام كەس قسە ناكات. هەرچەندە لە رووی ئاینەوە، جەژنی رەمەزان تەنیا یەك رۆژە و لەو رۆژەدا بە گوێرەی نەریتی باو، خۆشی و شادی دەردەبڕدرێت، بەڵام ئەو رۆژە بۆ بنەماڵەی (حەنیفە) دەبێتە شیوەن و ماتەم و منداڵەكان بەرگی نوێ و جوانیان لەبەر ناكرێت و چوكلێت و شیرینی لە ماڵە گەورەكەی (حاجی مەجروم) نابینرێت، چونكە (حەنیفە) نەگەڕاوەتەوە، لەگەڵ دەستی خۆیدا بۆیان بهێنێت. سكاڵا و زانیاری پشتڕاست نەكراو نەك تەنیا ماڵی (حاجی مەجروم)، بەڵكو تەواوی گوندی (ئەسپیندارە) و خزمەكانی ئەو بنەماڵەیە، تووشی شۆك دەبن و هەمووان گوێ بۆ دەنگی گەڕانەوەی (حەنیفە) هەڵدەخەن، بەڵام كەس نازانێت، كەی دەنگی تەپەی كەوشە پاژنە بەرزەكانی (حەنیفه) دڵیان دادەخورپێنێت. ئێوارەی رۆژی (29 / ئەیلوول – سێپتێمبەر / 2008) كەسوكاری (حەنیفە)، لە بنكەی پۆلیسی (سەرمەیدان) لە شارۆچكەی شەقڵاوە سكاڵا تۆمار دەكەن و هەموو كون و قوژبنێكی شارۆچكەكە دەگەڕێن و پەیوەندی بە ئاسایش و نەخۆشخانەكانەوە دەكەن، بەڵام وەڵامیان دەستناكەوێت. (خەلیل) لە درێژەی گێڕانەوەكەیدا گوتیشی: "رۆژی دووەمی جەژن، كەسێك بەناوی ملازم (ع.)، بانگی كردین بۆ بەڕێوبەرایەتی پۆلیس و لەوێ بە باوكمی گوت: كچەكەت دوێنێ كات (4)ی ئێوارە لەگەڵ (خ. ئ. م.) كە ناسیاوی خۆتانە سواری سەیارە بووە و شاهێدی نهێنی هەیە، كە بینیویەتی و ئێوە سكاڵای خۆتان لەسەر ئەو تۆمار بكەن". لەسەر بنەمای زانیارییەكانی ئەو بەرپرسەی پۆلیس (حاجی مەجروم) سكاڵا لەسەر (خ. ئ.) كە ئەو كاتە پلەكەی ملازمی پلە یەك بووە، تۆمار دەكات. "لە رۆژی دادگاییكردندا، هەرچەندە (خ.ئ.) ئامادە دەبێت، بەڵام ملازم (ع.) ئامادە نابێت، شاهێدە نهێنییەكە بهێنتێتە دادگا و زانیارییەكان پشتڕاست بكاتەوه و دادوەر بەهۆی نەبوونی بەڵگەی سەلمێنەر (خ. ئ.) بێبەری دەكات لە تۆمەتەكان". دوای ئەوەی ملازم (ع.) زانیاری پشتڕاستنەكراوویان دەداتێ، ئەمانیش سكاڵا لەسەر ملازم (ع.) تۆمار دەكەن، بەڵام ئەو سەرەتا ئامادە نابێت، بچێتە بەردەم دادگا، دواتر بەهۆی نەبوونی بەڵگەوە دادوەر ئەویش لە تۆمەتەكان بێبەری دەكات. براكەی (حەنیفە) ئەوەشی گوت: "ملازم (خ.ئ.) تۆمەتەكەی خستە پاڵ ملازم (گ. ر. ئ.) كە ئەفسەری ئاسایشی گشتی بووە ئەو كاتە لە بەشی دژە تیرۆر و گوتی: بینویانە لەناو گەڕەكی مەسیحییەكانی شەقڵاوە بەیەكەوە بوونە". براكەی (حەنیفە) هەروەها گوتی: "سكاڵامان لەسەر ملازم (گ. ر. ئ) تۆمار كرد، وەك میوان بانگی دادگا كرا و هیچی لەسەر نەسەلمێندرا و دادوەر ئازادی كرد". گوتیشی: "ئەوانەی ئێمە سكاڵامان لەسەر تۆمار دەكردن، وەك میوان بانگی دادگا دەكران و سەردانەكەیان تەشریفاتی بوو، بۆیە بێهیوابووین و تا ئێستا هیچیان لەگەڵ نەكراوە". پێناسە حزبیەكانی حەنیفە زەوت دەكرێن دوای بێهیوابوونیان لە پۆلیس و سكاڵا تۆماركردن، یادداشتێك بەرز دەكەنەوە بۆ سەرۆكایەتی هەرێم و ئاژانسی پاراستن و دەزگای هەواڵگری گشتی. لە سەرۆكایەتی هەرێمەوە وەڵامیان بەوە دەدرێتەوە كە سكاڵا تۆمار بكەنەوە، لە دەزگای هەواڵگری گشتیش، بانگ دەكرێن و سەرەتا بە روویەكی گەشەوە پێشوازییان لێدەكرێت، ناسنامە و پێناسە حزبییەكانی (حەنیفە)یان لێوەردەگیرێت و دواتر بە شێوەیەكی وەك براكەی حەنیفە وەسفیكرد "ناشیاو" پێیان دەوترێت "چیدیكە روو نەكەنەوە هەواڵگری"، بەڵام تا ئێستا لە لایەن دەزگای (پاراستن)ەوە وەڵامیان پێنەگەیشتووەتەوە. "گیراوە و لە تەحقیقە" سەرەڕای ئەو هەموو بێنە و بەردەیەی بە بنەماڵەی (حاجی مەجروم) كراوە، دواجار وەك براكەی (حەنیفە) گوتی: "لەگەڵ باوكم چووینە لای بەڕێوبەری پۆلیسی هەولێر، عەمید (عەبدولخالق تەڵعەت)، ئەو پێی گوتین، كێ دەڵێ كچی ئێوە رفێندراوە، بڕۆنەوە بۆ ماڵ و كچەكەتان زیندووە". گوتیشی: "لەبەر ئەوەی ئێمە لە رووی حزبییەوە سەر بە رێكخراوی سێتاقانی پارتی دیموكراتی كوردستانین، لە رێگەی بەرپرسی رێكخراوەوە سكاڵامان گەیاندە لای بەرپرسی ناوچەی ئاڵای پارتی (مۆیەد حاجی عەلی) و دوای ماوەیەك لە رێگەی كارگێڕی رێكخراوی سێتاقان (تەحسین سڵێمان) بەشێوەی زارەكی ئاگادار كراینەوه، كە (حەنیفە) ماوە و گیراوە و لە تەحقیقە". "لەبەر ئەوەی كچ بوو نەمانتوانی لە راگەیاندن باسی بكەین" (خەلیل مەجروم) گوتی: "ئێمە هەموو ئەو مەسەلەیە بە سیناریۆ دەزانیین و تەنیا بۆ مەشغوڵكردنی ئێمەیە، ئێمە پەنامان بردە بەر یاسا و نەمانویست بە شێوەیەكی دیكە، كێشەكە چارەسەر بكەین". بنەماڵەكەی (جاجی مەجروم)، وەك ئەو پەندەی دەڵێ (كاسە بشكێت؛ نەك بزرێت)، پێیان نەنگی بووە، لە رێگەی راگەیاندنەوە باسی كێشەكەیان بكەن و ئەو رووداوە ببێتە هۆی زڕانی ناوبانگی بنەماڵەكەیان، وەك خۆی گوتی: "لەبەر ئەوەی ئافرەت بوو، نەماندەتوانی لە راگەیاندن باسی بكەین". هەروەها لەبەر ئەوەی بنەماڵەیەكی حزبی بوونە نەیانویستووە، حزبەكەیان تۆمەتبار بكەن و گوتی: "تەنانەت لە هەڵمەتی هەڵبژاردنی رابردوو چەند كەناڵ هاتن باسی بكەین، بەڵام ئێمە لەبەر ئەوەی پارتی بووین، پێمان خۆش نەبوو، لە راگەیاندن پرسیار لەسەر پارتی درووست بكەین". هەروەها گوتی: "ئێمە خۆمان كردە قوربانی ئەوان، تەنانەت چووینە لای شێخ ئەدهەم بارزانی، كە دایكم و باوكمی بینی، زۆر بە پەرۆشەوە وتی شتی وا هەر مەقبول نییە، وتی بە جەنابی كاك مەسعودیش دەڵێم، ئەویش ئێمەی ناردە لای هەواڵگری، لەوێ بە بەرپرسی هەواڵگریمان وت: روون و ئاشكرا ئەو خوشكەمان لای تۆ گیراوە، بەڵام بەرپرسی دەزگای هەواڵگری وتی من زیندانم نییە". ئەو كە لەگەڵ ئامۆزاكەی دانیشتبوو، لە قسەكانی بەردەوام بوو، گوتی: "لە سەردەمی كابینەی پێنجەمەوە ئەو خوشكەم دیار نەماوە و تا ئێستا كەس لێی نەپرسیوینەتەوە و هێشتا سكاڵامان لەسەر ئەو كەسانە ماوە، هەتا خوشكەكەم چارەنووسی دەرنەكەوێت، سكاڵامان هەر دەمێنێت". ئەو كە چوار ساڵە خەمی بێسەروشوێن بوونی خوشكەكەی لە دڵیدا وەك كێوێك لە زووخاو هەڵچنراوە، گوتیشی: "ئیدی تەحەمولمان نەماوە، خوشكێكیشم هەر بە خەمی (حەنیفە)وە كۆچی دواییكرد، دایك و باوكم كە بەساڵاچوون ئۆقرەیان لەبەر نەماوە و هەموومان تەواو شپرزە بووینە". لەسەر پاراستن پرسیاریان بۆ درووست بووە براكەی (حەنیفە)، لە بارەی هەوڵەكانی خۆیانەوە بۆ بەدواداچوونی چارەنووسی خوشكەكەیان، گوتی: "خوشكەكەم كادیری حزبی بووە و لە رێكخستن ئیشی كردووە و بە زمانی خۆیشی وتوویەتی، كە ئەو كادیرە و سەردانی مەسیفی كردووه، بەڵام لەبەر ئەوەی كارەكەی نهێنیی بووە ناتوانیین بیسەلمێنیین، كە ئەندامی پاراستن بووه، چونكە كاتێك چووینە هەواڵگری هەندێك ناسنامەیان لێگێڕاینەوە و ئەو كاتە بایەخی ئەو شتانەمان نەدەزانی و زۆر شپرزە بووبووین و ئەو كاتە هەڵەیەكی گەورەمان كرد". براكەی (حەنیفە) دەڵێ: "ئێمە وەكو خێزانێكی پارتی، وەكو ئەندامی حزبی، پرسیارمان لەسەر ئاژانسی پاراستن هەیە، چونكە ئەو بەرپرسە لە ئەمنییەتی هاووڵاتیان". گوتیشی: "وەڵامی رێكخراوی حزب و بەڕێوبەری پۆلیسش بۆمان ئەوە بووە، كە (حەنیفە) ماوە، مافی خۆمانە بپرسین ئەی لە كوێیە و كوا؟ ئێمە دەمانەوێت بزانین ئەو ئافرەتە لە كوێیە، چارەنووسی دیار بكرێت، هیچ نا پێمان بڵێن، ئەو ئافرەتە ئەو تاوانەی ئەنجامداوە و حوكمەكەی ئەوەیە، بەهەموو شتێك رازین". روونیشیكردەوە، ئەوان سەردانی خاچی سووری نێودەوڵەتیشیان كردووە و ئەوانیش تا ئێستا هیچ زانیارییەكیان دەستنەكەوتووه و تەنانەت بەرپرسانی خاچی سووریش نەیانتوانییوە لە دەزگا ئەمنییەكانەوە وەڵامێك بۆ ئەو كەیسە بەدەستخەن. رێكخراوەكانی ژنان و كابینەی پێنجەم لە سەردەمی كابینەی پێنجەمی حكومەتی هەرێم، كە بە كابینەی یەكگرتنەوە ناودەبرێت، وەزارەتێكی پەیوەست بە پرسی ژنان لەو كابینەیەدا دامەزرابوو، بەڵام كابینەكەی حكومەت و وەزارەتە پەیوەندیدارەكەشی لە ئاست ئەو كەیسەدا جگە لە بێدەنگی هیچی دیكەیان هەڵنەبژاردووە. (خەلیل مەجروم) گوتی: "ئێمە لە سەردەمی كابینەی پێنجەمدا، كە وەزیرێكی تایبەت بە كاروباری ژنان هەبوو، چووین و باسەكەمان بۆ گێڕایەوە، سەرەتا زۆر پەرۆش بوو، هەر راستەوخۆ پەیوەندی بە نەخۆشخانەی شەقڵاوەوە كرد، بەڵام دوای پاشەكشێی لێكرد و تەنانەت لە رێگەی بەڕێوبەرایەتی بەدواداچوونی توندوتیژییەوە هەوڵماندا، بەڵام هەر ماوەیەك گەرم بوون، دوای پاشەكشەیان كرد". ئەو برایەی (حەنیفە) هاوكات لەگەڵ باسكردنی وێنە و ئادگارەكانی خوشكەكەی، دەیگوت: "هیچیان بۆ ئێمە نەكردووە، وەكو هاووڵاتییەك، وەكو پارتییەك، وەكو ئەندامێكی حزبی، بەس وەڵامێكمان بدەنەوە، دڵنیامان بكەنەوه، هەرچی بێت، ئێمە رازین، تەنانەت بڵاویشی ناكەینەوە، بەس دڵنیامان بكەنەوە". دایكی (حەنیفە)، لەدایكبووی (1954)ەو بە هۆی خەمی بێسەروشوێن بوونی كچە گەنجەكەیەوە، لەگەڵ (حاجی مەجروم)ی هاوسەریدا، وێڕای نەخۆشی و گرفتارییەكەیەوە، هەمیشە چاوەڕوانی هاتنەوەی كچەكەی دەكات و لە بارێكی دەروونی ناجێگیردایە و وەك كوڕەكەی باسی كرد، ئەو لە هیچ شوێنێك ئۆقرە ناگرێت و لەگەڵ (حاجی مەجروم)دا گریان بووەتە نان و ئاویان. بڵاوبوونه‌وه‌ی هه‌واڵی بێسه‌روشوێن بوونی (حه‌نیفه) لە كاتێكدایە، كە سەرۆكی هەرێمی كوردستان (مەسعود بارزانی) لە پەیامێكدا رایگەیاندبوو، ئامارەكانی توندوتیژی "جێگەی نیگەرانیین" و "بە بۆنەی رۆژی جیهانی بەرەنگاربوونەوەی توندوتیژی لە دژی ئافرەت، داوا لە هاووڵاتییانی خۆشەویست و دامودەزگا پەیوەندیدارەكان و ناوەندە هزری و میدیایی و رۆشنبیرییەكانی كوردستان دەكەم، بە جددی كار بۆ باشتربوونی دۆخی ئافرەت لە كۆمەڵگە بكەن و رووبەڕووی ئەو توندوتیژیانە ببنەوە, كە دژ بە ئافرەت دەكرێ".        ئا: ئه‌رسه‌لان ره‌حمان |
ليست هناك تعليقات:
إرسال تعليق