هەولێر: لە هەشتی مارسدا كچ و كوڕێك بە چەك كوژران
هەولێر: لە هەشتی مارسدا كچ و كوڕێك بە چەك كوژران |
01:37:08/03/2013 |
 وارڤین – هەولێر: ئێوارەی رابردوو، لە سەر رێگەی سەرەكی كەسنەزان – كۆیە، كچ و كوڕێكی گەنج، لە ناو ئۆتۆمبێڵێكدا درانە بەردەستڕێژی گولە و كوژران و تەرمەكانیان بەجێهێشترا و دوای كاتژمێرێك لە كوشتنیان پۆلیس گەیشتە شوێنی رووداوەكە. لە كاتێكدا ژنانی جیهان لە ساڵڕۆژی جیهانی ژناندا، یادی رۆژی هەشتی مارس دەكەنەوە و حكومەت و لایەنە رەسمییەكان و رێكخراوەكانی ژنانیش لە هەرێم، سەرقاڵی ئەنجامدانی چالاكی گوڵ دابەشكردنن، لە نزیك شاری هەولێری پایتەختی هەرێمی كوردستان، كچ و كوڕێك كوژران. لە لێدوانێكی تایبەت بۆ (وارڤین)، بەڕێوبەری نووسینگەی بەرەنگاربوونەوەی توندوتیژی كۆیە، ملازم (دانا حاجی حەسەن) رایگەیاند، تاوانەكە لە نزیك گوندی (پەلكە رەش)ی سەر بە شارەدێی (دێگەڵە) ئێوارەی رۆژی پێنجشەممە (7 / ئازار – مارس / 2013) روویداوە. گوتیشی: "كچەكە ناوی (هێلین ع.ع.)ەو تەمەنی (20 ساڵ) و كوڕەكەش ناوی (خەسرەو ئ.ع) تەمەنی (24 ساڵ)ە و لە ناو ئۆتۆمێلێكدا بوونە و كوڕەكە دەستی بەستراوەتەوە و پێدەچێت بە دەستبەستراوی هێنرابنە ئەو شوێنە و گولە بارانكرابن". روونیشیكردەوە، ئەو كچ و كوڕە دانیشتووی شارەدێی كەسنەزانی سەر بە شاری هەولێرن و بەو هۆیەوە پەڕاوی لێكۆڵینەوەیان لە هەولێرە و بە مەبەستی پشكنینی پزیشكی تەرمەكانیان رەوانەی پزیشكی دادوەری هەولێر كراوە. ئا: ئه‌رسه‌لان ره‌حمان. |
ليست هناك تعليقات:
إرسال تعليق