لە فیستیڤاڵی هەولێردا كەرنەڤاڵی منداڵان بەڕێوەچوو
04:17:17/03/2013 |
وارڤین - هەولێر: لە چوارەم رۆژی فیستیڤاڵی حەوتەمی هەولێردا، كەرنەڤاڵی منداڵان بە بەشداری بەڕێوبەرایەتی رۆشنبیری منداڵ و تیپی موزیكی نەورۆز و سێ قوتابخانەی نێودەوڵەتی بەڕێوەچوو، تێیدا منداڵانی پایتەخت بە موزیكی و گۆرانی و سەما و شانۆ، بەهرە و هونەری خۆیان نمایشكرد. رۆژی پێنجشەممە (14 / ئازار – مارس / 2013)، لە درێژەی چالاكییەكانی فیستیڤاڵی حەوتەمی هەولێردا، هەریەك لە بەڕێوبەرایەتی رۆشنبیری منداڵ – هەولێر، بەڕێوبەرایەتی چالاكی قوتابخانەكان، قوتابخانە نێودەوڵەتییەكانی (سەروەران، فاخیر مێرگەسۆری، شوەیفات)، بە چەندین چالاكی هونەری كەرنەڤاڵی منداڵان بەڕێوەچوو. لە سەرەتای كەرنەڤاڵەكەدا، (تیپی موزیكی نەورۆز) سەر بە بەڕێوبەرایەتی رۆشنبیری منداڵ – هەولێر بە چەند پارچە موزیك و گۆرانییەكی پێشكەشكرد و دواتر هەریەك لە گروپی منداڵانی قوتابخانە نێودەوڵەتییەكان بە چالاكی گۆرانی و سەمای بالێ بەشدارییان كرد. هەریەك لە گروپە هونەرییەكانی منداڵان (گروپی دۆق شارتەر، گروپی هاوڕێیانی هونەر، گروپی ئەستێرە، قوتابخانەی هەڤاڵی بنەڕەتی تێكەڵاو)، وەك هاوكار بەشدارییان كرد. وێڕای پێشكەشكردنی گۆرانی و موزیك، سەمای بالێ و چەند شانۆگەرییەكی منداڵانیش نمایشكران. رۆژی چوارەمی فیستیڤاڵ، بە ئامادەبوونی سەدان كەس لە گەشتیاران و دانیشتووانی هەولێر و ئارەزوومەندانی هونەر و بەهرەی منداڵان بەڕێوەچوو. بڕیار وایە فیستیڤاڵی حەوتەمی هەولێر، كە لە (11ی ئازار)ەوە دەستیپێكردووە، تا هەڵكردنی ئاگری نەورۆز بەردەوام بێت. |
ليست هناك تعليقات:
إرسال تعليق